21–22 tamyz künderı Qostanaida Qostanai Investment Forum 2025 öttı. Ol aimaqta sifrlandyru, jasandy intellektını engızu jäne joǧary tehnologiialyq jobalarǧa investisiia tartu mäselelerıne arnalǧan eŋ ırı öŋırlık alaŋǧa ainalyp, memlekettık organdardyŋ, halyqaralyq ūiymdardyŋ, biznes-qoǧamdastyq pen IT-industriianyŋ ökılderın bırıktırdı.
Forum qarsaŋynda, 21 tamyzda, öŋırdıŋ sifrlyq infraqūrylymyn keŋeituge baǧyttalǧan maŋyzdy bastamalar ıske qosyldy. Atap aitqanda, ūialy bailanys bazalyq stansiialary jobasynyŋ ekınşı kezeŋıne start berıldı. Onyŋ bırınşı kezeŋı ötken jyldyŋ jeltoqsanynda ıske qosylyp, oblystyŋ 15 auylynda tūraqty ūialy bailanys qamtamasyz etılgen bolatyn. İnisiativany jalǧastyru maqsatynda Qostanai oblysynyŋ äkımı Qūmar Aqsaqalov pen Beeline Qazaqstan kompaniiasynyŋ basşylyǧy, sonyŋ ışınde Rauan Qabdrahimov, telekommunikasiialyq infraqūrylymdy odan ärı damytu jönındegı yntymaqtastyq turaly memorandumǧa qol qoidy. Oblys basşysy būl jobanyŋ memleket pen biznestıŋ ärıptestıgı nätijesınde jüzege asyp jatqanyn jäne ärbır tūrǧynnyŋ özın bıryŋǧai sifrlyq keŋıstıktıŋ bır bölıgı retınde sezınuıne baǧyttalǧanyn atap öttı.
Sol künı, 21 tamyzda, Qostanai Hub alaŋynda startap-qoǧamdastyqqa arnalǧan ıs-şaralar öttı. Dästürlı Pizza Pitch formatynda jas käsıpkerler öz jobalaryn sarapşylar alqasyna jäne investorlarǧa tanystyrdy. Sondai-aq Forbes «30 under 30» tızımınıŋ üzdıkterımen kezdesu ūiymdastyryldy. Olardyŋ arasynda EasyTap platformasynyŋ negızın qalauşy Mazgūm Toleş, Sporttyq baǧdarlamalau federasiiasynyŋ bas hatşysy Adina Magavina jäne IGPS Tech kompaniiasynyŋ teŋqūruşysy Miras Baijıgıt bar. Būl bastamalar öŋırlık tehnoparktyŋ innovasiialar men IT-qoǧamdastyqty qoldaudaǧy maŋyzyn aiqyndady.
Forumnyŋ negızgı bölıgı 22 tamyzda KIA Qazaqstan zauytynda öttı. Mūnda öŋır käsıporyndarynyŋ sifrlyq şeşımder men jasandy intellekt salasyndaǧy äzırlemelerı ūsynylǧan tehnologiialyq körme ūiymdastyryldy.
Plenarlyq otyrysty qazaqstandyq sarapşy Rahym Oşaqbaev aşty. Talqylaularda jasandy intellektını damytu jäne sifrlandyrudyŋ negızgı mäselelerı qaraldy. Oblys äkımı Qūmar Aqsaqalov öŋırde bırqatar baǧyttar boiynşa jasandy intellektınıŋ ıs jüzınde qoldanylyp jatqanyn atap öttı. Jūmys Memleket basşysy Ükımettıŋ jaqynda ötken keŋeitılgen otyrysynda qoiǧan – jasandy intellektını öŋırlerde belsendı engızu jönındegı tapsyrmalaryna säikes jüzege asyryluda. Sonymen qatar, ol agroönerkäsıptık keşende «aqyldy fermalar» tūjyrymdamasyn ıske asyrudy jäne tūrǧyn üi-kommunaldyq şaruaşylyqta jylu jelılerınıŋ qūbyrışılık diagnostikasy siiaqty tehnologiialardy qoldanudy qamtityn basym baǧyttardy aiqyndady. Äkımnıŋ aituynşa, Qostanai oblysy investorlar men IT-kompaniialardyŋ nazaryn audaryp otyr jäne innovasiialar salasynda köşbasşy öŋırlerdıŋ bırıne ainaluǧa äleuetı jetkılıktı.
Plenarlyq otyrysta halyqaralyq sarapşylar söz söiledı. Qazaqstandaǧy EO elşısı Aleşko Simkich 2025 jyldyŋ 1 tamyzynda küşıne engen Europalyq Odaqtyŋ Jasandy intellekt turaly jaŋa zaŋyna şolu jasap, bet-älpettı tanu, prediktivtı taldau jäne generativtı tehnologiialar siiaqty jüielerdı retteu qaǧidalaryn tüsındırdı. Sifrlyq damu vise-ministrı Dmitrii Mun Astana Hub tehnoparkınıŋ jäne onyŋ Qostanaidaǧy filialy – Qostanai Hub-tyŋ maŋyzyn atap ötıp, Startup Garage baǧdarlamasy aiasynda Qostanai oblysy ötınım sany boiynşa elde üşınşı oryn alǧanyn habarlady. «Astana» qarjy ortalyǧynyŋ basqaruşysy Renat Bektūrov sifrlyq, «jasyl» jäne tehnologiialyq jobalarǧa şeteldık investisiia tartu tetıkterın aiqyndady.
Telekommunikasiia salasynyŋ perspektivalary turaly «Qazaqtelekom» AQ basqarma töraǧasy Baǧdat Musin aityp, ūlttyq beinemonitoring jüiesı, AI-Mektep bılım beru platformasy, orman örtın erte anyqtauǧa arnalǧan drondar men jasandy intellekt tehnologiialary boiynşa bastamalardy tanystyrdy. KIA Qazaqstan zauytynyŋ bas direktory Kim De Ki öndırıste şamamen 70 önerkäsıptık robotty engızu josparyn jariialap, avtomattandyru deŋgeiı men önım sapasyn tūraqty qamtamasyz etuge mümkındık beretının jetkızdı. METOS kompaniiasynyŋ ökılı Sergiu Smocinschi zamanaui egınşılıkte sifrlyq derekterdıŋ maŋyzyn, olardyŋ ösımdık aurularyn boljauda jäne avtonomdy tehnikany qoldanudaǧy rölın atap öttı. Qazaqstandaǧy IT-kompaniialar qauymdastyǧynyŋ prezidentı İrina Sulimenko mal şaruaşylyǧynda jasandy intellektını qoldanudyŋ täjıribesımen bölısıp, januar aǧzasyna engızıletın sensorlar negızınde fermerlerge aldyn alu ūsynymdaryn jıberetın «sifrlyq veterinar» jüiesın mysalǧa keltırdı. Öz şeşımın Mazgūm Toleş te tanystyryp, bölşek sauda jäne HoReCa sektory üşın saǧattyq qyzmetkerlerdı ızdeuge arnalǧan EasyTap onlain-servisın ūsyndy.
Forum öŋırdıŋ sifrlyq transformasiia baǧdarlamasyn ıske asyrudaǧy maŋyzdy kezeŋ. Şara Qostanai oblysynyŋ sifrlyq şeşımderdı belsendı engızıp qana qoimai, investorlarǧa arnalǧan tolyqqandy ekojüie qalyptastyryp jatqanyn körsettı jäne jalpyūlttyq damu basymdyqtaryna säikes innovasiialar salasynda aldyŋǧy qatarly pozisiialardy ielenuge ūmtylysyn aiqyndady.
