Astanada Smart City tūjyrymdamasy aiasynda halyqaralyq G42 holdingımen bırlesıp, qoǧamdyq qauıpsızdık pen qalalyq ortany basqaru salasynda jasandy intellekt tehnologiialaryn engızu jobasy belsendı türde jüzege asyryluda. Onyŋ ışınde zamanaui megapolister täjıribesıne süiene otyryp, videosaraptamanyŋ 35-ten astam türı jäne jol qozǧalysynyŋ erejelerı būzylǧanyn tırkeudıŋ 15 ädısı engızılıp jatyr.
Qoǧam ökılderımen, sarapşylar qauymdastyǧymen, jastarmen, käsıpkerlermen jäne mäslihat deputattarymen Qazaqstan Respublikasynyŋ Prezidentı Qasym-Jomart Kemelūly Toqaevtyŋ «Jasandy intellekt däuırındegı Qazaqstan: özektı mäseleler jäne ony tübegeilı sifrlyq özgerıster arqyly şeşu» atty Joldauy talqylandy.
Biyl Astanada EXPO aumaǧynda Alem.AI Halyqaralyq jasandy intellekt ortalyǧy aşylady. Būl ortalyq Jİ-ekonomikany damytuǧa, ǧylymi zertteulerdı qoldauǧa, sifrlyq salaǧa investisiialar tartuǧa jäne özge de maŋyzdy baǧyttardyŋ damuyna serpın beredı.
Sol siiaqty elordada tırşılıktıŋ negızgı salalaryna ozyq tehnologiialar belsendı türde engızılıp jatyr. Mäselen, tūrǧyn üi-kommunaldyq şaruaşylyq salasynda jasandy intellekt modulderı azamattardyŋ ötınışterın naqty uaqyt rejimınde taldaidy. Qalada tūrmystyq qatty qaldyqtardy jinau üderısı tolyqtai sifrlandyrylǧan. Operatorlardyŋ jūmysy GPS-monitoring jäne fotofiksasiia jüiesı arqyly jedel baqylanady.
Densaulyq saqtau salasynda maŋyzdy qadam PACS jüiesın – jasandy intellektısı bar sifrlyq radiologiia engızu boldy. Ol 4 millionnan astam zertteudı bıryŋǧai mūraǧatqa engızıp, diagnostikalau merzımın edäuır qysqartuǧa mümkındık beredı.
Mektepter zamanaui tehnikalyq bazamen jabdyqtaldy, 143 STEM-kabinet aşylyp, tehnikalyq ǧylymdardy tereŋdetıp oquǧa jaǧdai jasaldy. Aldaǧy uaqytta jasandy intellektını oqyp-üirenuge jäne qoldanuǧa baǧyttalǧan sabaqtardy kezeŋ-kezeŋımen engızu josparlanyp otyr.
Kölık salasynda LRT-nyŋ GoA-4 deŋgeiındegı eŋ joǧary avtomattandyrylǧan basqaru jüiesı engızılıp jatyr, būl jüie poiyzdardyŋ qozǧalysyn maşinistıŋ qatysuynsyz tolyqtai avtomatty rejimde basqarady.
Memleket basşysynyŋ jasandy intellektını damytu jönındegı Joldauy aiasynda elordada AI-keŋes qūryldy. Keŋes qala infraqūrylymyna jasandy intellekt tehnologiialaryn engızu, IT-ekojüienı damytu, sifrlyq transformasiiany ılgerıletu boiynşa ūsynystar äzırleidı, sondai-aq sifrlyq bastamalarǧa saraptamalyq baǧa berıp, olardyŋ üilestıruın qamtamasyz etedı.
Prezident tapsyrmalary jüielı türde, qala tūrǧyndarynyŋ müddelerı men qoǧamdyq ūsynystardy eskere otyryp oryndalady.
Kezdesu qorytyndysy boiynşa Prezident Joldauyn qala deŋgeiınde jüzege asyruǧa qatysty naqty ūsynystar qabyldandy.
Ūqsas jaŋalyqtar
