Erjan Erkınbaev QR Turizm jäne sport vise-ministrı qyzmetınen bosatyldy, dep habarlaidy "Adyrna" ūlttyq portaly.
Būl turaly QR Premer-ministrınıŋ baspasöz qyzmetı mälımdedı.
«Qazaqstan Respublikasy Ükımetınıŋ qaulysymen Erjan Mälıkūly Erkınbaev basqa jūmysqa auysuyna bailanysty QR Turizm jäne sport vise-ministrı qyzmetınen bosatyldy», – delıngen habarlamada.
Erjan Erkınbaev būl qyzmetke 2023 jyldyŋ qaraşa aiynda taǧaiyndalǧan edı.
Erjan Erkınbaev 1982 jyly Jambyl oblysynda düniege kelgen. Qazaq memlekettık zaŋ akademiiasyn jäne Halyqaralyq biznes akademiiasyn tämamdaǧan.
Eŋbek jolyn 2002 jyly kommersiialyq kompaniiada zaŋger bolyp bastaǧan. Keiın türlı jyldary kommersiialyq qūrylymdarda zaŋger, atqaruşy direktor, bas direktor qyzmetterın atqardy.
Sonymen qatar ol «Şymbūlaq» tau şaŋǧysy kurortynyŋ, «Medeu» sport keşenınıŋ bas direktory, Almaty memlekettık zoologiialyq parkınıŋ direktory boldy. VI şaqyrylymdaǧy Almaty qalalyq mäslihatynyŋ deputaty retınde de eŋbek ettı.
2019-2021 jyldary «Kazakh Tourism» ūlttyq kompaniiasyn basqardy. Al 2021–2023 jyldary QR Mädeniet jäne sport vise-ministrı qyzmetın atqardy.
