Osydan tura 105 jyl būryn, iaǧni 1920 jyly 26 tamyzda, Bükılreseilık Ortalyq Atqaru Komitetı (BROAK) men RKFSR Halyq Komissarlary Keŋesı (HKK) Qazaq Avtonomiialyq Keŋestık Sosialistık Respublikasyn (Qazaq AKSR) qūru turaly Dekret qabyldady.
Būl Dekretke säikes, jaŋadan qūrylǧan Qazaq avtonomiiasynyŋ astanasy retınde Orynbor qalasy bekıtıldı, al Seiıtqali Meŋdeşev Qazaq AKSR Ortalyq Atqaru Komitetınıŋ alǧaşqy töraǧasy bolyp taǧaiyndaldy.
BROAK-tyŋ 1920 jylǧy 22 qyrküiektegı qosymşa Dekretımen Orynbor qalasy men guberniiasy Qazaq AKSR qūramyna engızıldı. 1920–1925 jyldar aralyǧynda Orynbor respublika astanasy qyzmetın atqardy.
1925 jyly Qazaq AKSR aumaǧyna Türkıstan AKSR-nıŋ qūramynda bolǧan Syrdariia men Jetısu oblystary, sondai-aq Qaraqalpaq avtonomiialyq oblysy qosyldy. Osyǧan bailanysty astanany geografiialyq tūrǧydan qazaq halqynyŋ ortalyǧyna köşıru mäselesı köterıldı.
Qazaq Ortalyq Atqaru Komitetınıŋ 1924 jylǧy sessiiasynda astanany Taşkentke nemese Şymkentke köşıru ūsynyldy. Alaida, Mäskeudıŋ şeşımımen el astanasy retınde Aqmeşıt taŋdaldy. 1925 jylǧy 9 aqpanda Ortalyq Atqaru Komitetı astanany Orynbordan Aqmeşıtke köşıru turaly qauly şyǧardy.
Sol jyldyŋ säuırınde ötken Keŋesterdıŋ V sezınde «Kirgiz AKSR» atauy «Qazaq AKSR» bolyp özgertılıp, «kirgiz» degen būrmalanǧan etnonim «qazaq» dep tüzetıldı. Sonymen qatar, Aqmeşıt qalasynyŋ atauy Qyzylorda bolyp özgertıldı.
1925 jyldyŋ köktemı men jazynda memlekettık basqaru organdary jaŋa astanaǧa köşırıldı. Osy sätten bastap Qyzylorda respublikanyŋ saiasi, ekonomikalyq jäne mädeni ortalyǧy retınde qalyptasa bastady. Būl ürdıske Sūltanbek Qojanov, Tūrar Rysqūlov, Jalau Myŋbaev, Nyǧmet Nūrmaqov, Mūhamedjan Tynyşpaev sekıldı bırqatar memleket jäne qoǧam qairatkerlerı belsene aralasty.
Degenmen, Qyzylordanyŋ tabiǧi-klimattyq jäne ekonomikalyq jaǧdaiynyŋ kürdelılıgıne bailanysty 1927 jyly el astanasyn Almatyǧa köşıru jönınde şeşım qabyldandy. Būl ūsynysty Filipp Goloşekin bastaǧan BK(b)P Qazaq ölkelık komitetı ūsyndy. 1927 jylǧy 3 nauryzda Qazaq AKSR OAK men HKK arnaiy qauly qabyldap, ol keiın VI sezde bekıtıldı. RKFSR tarapynan 30 mamyrda maqūldanǧan būl şeşım Qazaqstan astanasynyŋ Jetısuǧa auysuyna jol aşty.
Almatyǧa köşuge Türkıstan-Sıbır temır jolynyŋ ıske qosyluy da äser ettı. Tabiǧi erekşelıkterı men geografiialyq tiımdı ornalasuy arqasynda Almaty az uaqyt ışınde million tūrǧyny bar ırı saiasi, mädeni, ekonomikalyq ortalyqqa ainaldy. 1997 jylǧa deiın Almaty Qazaqstan Respublikasynyŋ astanasy boldy.
