Almaty äuejaiynda qyzmetkerdı kepılge alǧany üşın qylmystyq kodekstıŋ üş baby boiynşa aiyptalǧan Maşrapbek Baratovtyŋ ısı boiynşa jaryssöz ötıp jatyr. Būl turaly inform.kz jariialady, dep habarlaidy "Adyrna".
Sotta aldymen jäbırlenuşıden jauap alyndy.
Jäbırlenuşı Botagöz Mūhtarova 2025 jyldyŋ 7 nauryzy tekseru qyzmetınıŋ inspektory retınde auysymǧa şyqqanyn aitty. Sol kezde oǧan qarai Baratov jaqyndap, jeke kuälıgı men ūşaqqa otyrǧyzu talonyn körsetuın sūraǧanda, ol üş minuttan keiın äuejaidy jaryp jıberetının aitqan.
«Ol oŋ jaq qaltasynan pyşaq şyǧardy, men aiqailadym, ärıptesterımdı kömekke şaqyrdym. Ol eşkım jaqyndamasyn, äuejaidy jaryp jıberemın dedı. Men şok aldym. Sol kezde polisiia qyzmetkerlerı, jolauşylar men ärıptesterım keldı. Men basymdy kötergen sätte qasymda Mūsa Äbdıraiym tūr eken, ol: «qyzdy jıber, ornyna menı al» dedı. Sodan keiın Baratov menı jıberdı», – degen jäbırlenuşı.
Sottaluşy pyşaq şyǧarǧanyn moiyndady. Onyŋ aituynşa, ol eşqandai talap qoimaǧan, tek kütu zalyna kırıp, ainalany şolǧysy kelgen. Alaida ol ne sebeptı äuejaidy jaryp jıberemın dep qorqytqanyn tüsındıre almady.
Is boiynşa memlekettık aiyptauşy Maşrapbek Baratovty 10 jyl 6 aiǧa sottaudy sūrady.
Eske salsaq, Maşrapbek Baratov 2025 jyldyŋ 7 nauryzynda Almaty äuejaiynda özınen qūjat sūraǧan kezde qauıpsızdık qyzmetınıŋ skrining qyzmetkerın şaşynan ūstap, pyşaqpen qorqytqan bolatyn. Oqiǧanyŋ kezdeisoq kuägerı Mūsa Äbdıraiym esımdı azamat Maşrapbekovtyŋ qaruyn tartyp alǧan. Artynşa prezident Qasym-Jomart Toqaev ony «Erlıgı üşın» medalımen marapattaǧan edı.
