«Qazaqstan temır joly» ūlttyq kompaniiasy» AQ basqarma töraǧasynyŋ qyzmetı älı de bos tūr. Al būl lauazymǧa uaqytşa atqaruşy retınde Erlan Qoişybaev taǧaiyndaldy, dep habarlaidy “Adyrna” ūlttyq portaly QazTAG agenttıgıne sıltep.
«QTJ basşysy qyzmetı älı de bos. Resmi taǧaiyndau bolǧan joq, Qoişybaev ışkı räsımderge säikes uaqytşa mındetın atqaruşy bolyp taǧaiyndaldy. Būl basqarma töraǧasy eŋbek demalysyna şyqqan jaǧdaimen bırdei – onyŋ ornyn uaqytşa Qoişybaev basar edı», – dedı derekköz.
Būǧan deiın 2021 jyldyŋ säuırınen berı QTJ-ny basqarǧan Nūrlan Sauranbaev kölık ministrı bolyp taǧaiyndalǧan bolatyn. Ol būl qyzmetke osyǧan deiın atalǧan ministrlıktı basqarǧan Marat Qarabaevtyŋ ornyna keldı. Qarabaev prezident Qasym-Jomart Toqaevtyŋ şeşımımen jūmystan bosatyldy, oǧan ministrlık qyzmetındegı kemşılıkterı üşın sögıs jariialanǧan edı.
QTJ basşysynyŋ uaqytşa mındetın atqaruşy Erlan Qoişybaev – Adeliia Ahmetovanyŋ jūbaiy. Al Adeliia – 2014 jyldan 2023 jylǧa deiın Şyǧys Qazaqstan oblysyn basqarǧan Danial Ahmetovtıŋ qyzy. Ahmetov «Eskı Qazaqstannyŋ» eŋ yqpaldy ökılderınıŋ bırı sanalyp, öŋırdı basqarǧan tūsta türlı sybailas jemqorlyq janjaldary men jeke müddelerdı qoldau äreketterı üşın qatty synǧa ūşyraǧan. Syni pıkırlerde memlekettık satyp alulardyŋ jabyq ötkızılıp, bırdei kompaniialardyŋ qaita-qaita jeŋıp otyrǧany, sondai-aq jobalardyŋ biudjetterı bekıtılgennen keiın bırneşe ese ösıp ketkenı jiı aitylǧan. Sondai-aq Ahmetovke zaŋsyzdyqtar men ädıletsızdıkterge jol bergenı, ainalasyndaǧy jemqorlyq äreketterge köz jūmǧany jönınde de aiyptaular bolǧan. Onyŋ otbasymen bailanysty ülken qarjylyq şyǧyndarǧa jäne Tūrǧysyn GES qūrylysyna qatysty dauly jaǧdailarǧa bailanysty janjaldar oryn alǧan. ŞQO tūrǧyndary bırneşe märte onyŋ otstavkasyn talap etse, käsıpkerler men qoǧam belsendılerı onyŋ saiasatyna aşyq türde qarsy şyqqan.
