24 mausym künı Qyrǧyzstannyŋ Şu oblysyna qarasty Tokmak qalasynyŋ merı Maksat Nusuvaliev arnaiy qyzmet tarapynan tıkelei jinalys üstınde ūstaldy. Būl jinalys Qyrǧyz Respublikasynyŋ Ūlttyq qauıpsızdık memlekettık komitetı (ŪQMK) töraǧasy Kamchybek Taşievtıŋ töraǧalyǧymen ötken. Oqiǧa turaly Economist.kg jazdy, dep habarlaidy “Adyrna”.
ŪQMK basşysy Taşiev şeneunıktı qamauǧa alu turaly būiryqty özı bergen. Jinalys Tokmak qalalyq äkımdıgınde ötken, sol jerde mermen bırge qalanyŋ kommunaldyq mülık basqarmasynyŋ basşysy Alişer Turatbek uulu men «Al-Kadr» qūrylys kompaniiasynyŋ bas direktory da ūstalǧan.
Ūstalǧan tūlǧalar Tokmak qalasyndaǧy infraqūrylymdyq jobalardy jüzege asyru kezınde zaŋbūzuşylyqtarǧa jol bergenı üşın küdıkke ılıngen. Aldyn ala mälımetter boiynşa, būl – jemqorlyq faktılerı boiynşa qozǧalǧan qylmystyq ıstıŋ aiasynda jürgızılgen tergeu ıs-şaralary.
Atalǧan jobalar qatarynda jaŋa saiabaq qūrylysy men sport mektebın kürdelı jöndeu bar. Būl ekı nysanǧa 2024 jyly şamamen 1 milliard som (şamamen 11,5 million AQŞ dollary) bölıngen. Alaida tūrǧyndar men qalalyq keŋes deputattary jūmystardyŋ sapasyna qatysty köptegen şaǧym jasaǧan. Olar bruschatkanyŋ standarttarǧa sai töselmegenın, suaru jüiesınıŋ jūmys ıstemeitının jäne jaryq baǧandarynyŋ tūraqsyz ekenın atap ötken.
Jaǧdaiǧa bailanysty Tokmak tūrǧyndary men qalalyq keŋes deputattary Qyrǧyzstan prezidentı Sadyr Japarov pen ŪQMK töraǧasy Kamchybek Taşievke beineündeu joldap, jaǧdaidy baqylauǧa aludy sūraǧan. Osydan keiın Taşiev Tokmakqa arnaiy kelıp, keŋes ötkızıp, onyŋ barysynda joǧaryda atalǧan tūlǧalardy tūtqyndauǧa pärmen bergen.
Tokmaktaǧy būl jaǧdai Qyrǧyzstanda memlekettık qarajattyŋ jūmsaluyn baqylau jäne sybailas jemqorlyqpen küreste naqty qadamdar jasalyp jatqanyn körsetedı. Tergeu amaldary jalǧasuda, al ūstalǧandar sot şeşımın kütıp otyr.
