Qyrǵyzstannyń mádenıet, aqparat, sport jáne jastar saıasaty mınıstrligi memlekettik ánurannyń jańa sózi men ánine konkýrs jarııalaǵanyn málimdedi, dep habarlaıdy "Adyrna" ulttyq portaly.
Bul týraly mınıstrliktiń resmı saıtynda jáne áleýmettik jelilerdegi paraqshalarynda habarlandy.
Konkýrs "Qyrǵyzstan halqynyń tarıhı murasyn, mádenı dástúrin jáne ulttyq birligin bildiretin kórkemdigi joǵary mýzykalyq shyǵarma" daıyndaý maqsatynda uıymdastyrylyp otyr. Usynylǵan shyǵarmalardy baǵalaıtyn komıssııa quramyna Joǵarǵy keńes depýtattary, memlekettik organ ókilderi, jazýshylar, kompozıtorlar jáne mádenıet qaıratkerleri enedi. Eger laıyqty shyǵarma tabylmasa nemese ótinish sany jetkiliksiz bolsa, konkýrs júzege aspaǵan bolyp sanalady.
Memlekettik ánurandy ózgertý bastamasyn 2024 jyldyń qazan aıynda Joǵarǵy keńes spıkeri Nýrlanbek Shakıev kótergen bolatyn. Ol Qyrǵyzstan táýelsizdik alǵan kezde qabyldanǵan ánurandy oryndaýdyń qıyn ekenin, keı azamattardyń ony tolyq aıtyp bere almaıtynyn alǵa tartqan.
Bul ıdeıany keıinirek el prezıdenti Sadyr Japarov ta qoldap, memlekettik sımvoldardy jańartýda turǵan eshteńe joq ekenin atap ótti.
