Memleket basshysynyń bir ǵana qateligi, tutas memleketti orny tolmas ókinishti jaǵdaılarǵa soqtyrýy múmkin ekenin kórdik. Keshegi Qaraqalpaqstanǵa qatysty Mırzııoevtiń bir ǵana "olaq sheshimi" - Ózbekstannyń álemdik arenadaǵy bedeline úlken keri áserin beretin boldy.
Buǵan deıin Ózbekstan eshqandaı saıası, áskerı odaqtarǵa qosylmaı beıtaraptyq ustaný arqyly batystyń aldynda "dıktatorlyq júıe" aıybynan aman qalyp kelgen bolsa(Ándijan oqıǵasyn batystyqtar elemeı kelgenindeı), Mırzııoevtiń osy sońǵy sheshimi Ózbekstandy qanshama baspaldaqqa keri shegindirip jiberdi. Ári, tynysh jatqan "jylannyń quıryǵyn basyp" aldaǵy uzaq ýaqytqa ózderine "bas aýyrý" taýyp aldy. Úlken "basaýyrý" tapty!
Budan bylaı osy qatelikteri resmı Tashkenttiń kóp máselelerde aıaǵyna tusaý bolatyn boldy. Tap osy oqıǵalar "álemdik oıynshylarǵa" Ózbekstanǵa saıası áser etýshi eń osal jerlerin kórsetip berdi. Mundaı áser etýshi "saıası tetikterdi" álemdik oıynshylar aldaǵy kezeńderde ártúrli máseleler boıynsha kelisim-sharttarǵa otyrarda, "jabyq esikterdiń" arǵy jaǵynda Ózbekstanǵa qarsy barynsha paıdalanatynyna eshkimniń shúbási bolmaý kerek.
Óıtkeni, kóptegen elderdegi osyndaı memleket tutastyǵyna qaýip tóndiretin anklabtaryn qarsy taraptary barynsha paıdalanady. Túrkııadaǵy Kúrdter aımaǵy, Iraktaǵy shııtter, Qytaıdyń Taıvany sekildi mysaldardy kóptep keltirýge bolady.
Meniń túsinbeı otyrǵanym - Mırzııoev osynyń bárin bilip otyryp qalaısha osyndaı qadamǵa barýǵa sheshim qabyldady? Óıtkeni, Mırzııoev saıasatqa Zelenskıı sekildi kezdeısoq búgin kelgen adam emes. Osy kezge deıingi Ózbekstannyń ishki-syrtqy saıasatynda ábden pisip-jetilgen saqa saıasatkerǵoı. Qaraqalpaqstan buǵan deıin bóliný jaıly halqaralyq arenaǵa múldem másele kótergen emes. Ári, Ózbekstannyń jarty terrıtorııasyn alyp jatqan óńir.
Túsiniksiz sheshim.
Bir ǵana joramal aıta alamyn.
Buǵan Mırzııoevti ıtermelen oı - Referendýmdaǵy óziniń kelesi saılaýlarǵa taǵy da túsýine múmkindik beretin jańa ózgeristerge bolýy múmkin qarsylyqtardy basqa arnaǵa buryp jiberý bolǵan-aý?! Biraq, munshalyq shý kóterilip ketedi dep oılamasa kerek.
Múmkin, tarıhta "Birtutas Ózbekstandy qurýshy" tulǵa retinde qalǵysy keldi.
Nemese, osy oıdy oǵan óziniń komandasynda "syrtqy kúshterdiń" yqpalyndaǵy bireýler ábden sińirip, osyndaı qadamǵa barýyna yqpal jasady. Osylaı ol "álemdik oıynshylardyń" qaqpanyna tústi. Endi ony óz erkine jiberýleri ekitalaı. Kemi 20 jyl resmı Tashkentti uzyn arqanmen ustap otyrady. Qıt etse shetelden saıası baspana alǵan bir-eki Qaraqalpaqstan ókilderine "minber berip" ınternet pen SMI-di shýlatyp qoıyp otyrady.
Osyndaı "otvod ýdara" degen tehnologııany bizdikiler de kóbirek paıdalanady. Myna jaǵdaıdan keıin bizdińkiler de azaıtatyn shyǵar. Otpen oınaýǵa bolmaıtynyn túsingen bolar.
Sóz sońynda aıtarym...
Osy qarqynmen Qaraqalpaqstan egemendigin alsa aldy, almasa ondaı múmkindik endi 50 jylda kelýi ekitalaı.
Bári ózderine baılanysty.
Kórshimizdegi kesheli-búgin bolyp jatqan qubylystar bizderge de úlken oı salýy kerek dep oılaımyn. Urandatý - haıp pen "arzan ataqqa" jaqsy. Bále aıaq astynda. Oılanbaı istep opyq jeýden saqtasyn. Memleket tutastyǵy bárinen joǵary.
Rústem ÁShETAEV,
"Adyrna" ulttyq portaly
