Belarus Respublikasynyŋ ışkı ıster ministrlıgı jol erejesın būzǧan qazaqstandyqqa eskertu jasady, dep habarlaidy “Adyrna” ūlttyq portaly Tengri Auto-ǧa sıltep.
Minsk qalasynda jol qozǧalysy erejelerın bırneşe märte būzǧan Qazaqstan azamatyna resmi eskertu jasady. Vedomstvonyŋ mälımetınşe, 32 jastaǧy äiel būǧan deiın de äkımşılık jauapkerşılıkke tartylǧan.
Qazaqstandyq nömırlı Mercedes-Benz G-Class kölıgı aldymen Minsk qalasynyŋ tarihi ortalyǧyndaǧy trotuarǧa qoiylǧany üşın synǧa ūşyraǧan. Keiın kölıktıŋ sauda ortalyqtarynyŋ bırınde mümkındıgı şekteulı jandarǧa arnalǧan tūraq ornyna zaŋsyz qoiylǧany anyqtalǧan.
Qūqyq qorǧau organdary beinebaqylau jazbalaryn zertteu barysynda taǧy bır zaŋbūzuşylyq deregın tırkedı. Atap aitqanda, jürgızuşı ekı jasar balany arnaiy balalar oryndyǧynsyz aldyŋǧy jolauşylar ornynda tasymaldaǧan.
Belarus IIM mälımetınşe, şeteldık azamattyŋ äreketterı el zaŋnamasyn bırneşe ret būzu faktılerın qamtidy. Osyǧan bailanysty äiel azamattyq jäne köşı-qon bölımşesıne şaqyrtylyp, qūqyq būzuşylyqtar qaitalanǧan jaǧdaida elden şyǧaryluy mümkın ekenı jönınde resmi türde eskertıldı.
Sonymen qatar vedomstvo onyŋ asyrauynda tört kämeletke tolmaǧan balasy baryn eskerıp, äzırge qataŋ şara qoldanbauǧa şeşım qabyldaǧanyn habarlady .
