Qadir túninde meshitten úıine qaıtyp kele jatyp, taksıde jumbaq jaǵdaıda qaıtys bolǵan 18 jasar jigittiń ata-ana istiń mán-jaıy tolyq qarastyrylmaǵyn aıtty, dep habarlaıdy "Adyrna" ulttyq portaly Almaty arnasyna silteme jasap.
18-ge tolǵanyna 2 apta bolǵan Rasýl meshitten úıine qaıtpaq nıetpen taksı shaqyrady. Tún jarymynda beıtanys eki jigitpen bir kólikte ketip bara jatyp, ol áleýmettik jelide tikeleı efırge shyǵyp ta úlgergen. Qazir qolda bar sanaýly derektiń biri - osy. Beınede Rasýl otyrǵan kóliktiń jol ortasymen ketip bara jatqanyn anyq baıqaýǵa bolady. Al jıekte toqtap turǵan júk kóligine baryp soǵylǵandaryn rólde bolǵan jigit te, onyń dosy da «uıyqtap ketippiz» dep túsindirgen.
«Eki ana, shofermen joldas, aman. Qolynda daq ta joq. Al meniń ulym kóliktiń artynda, qaýipsiz jerde otyrǵan. Beti de, basy da jaralynyp, denesiniń bári kógergen», – dedi R. Tursynbaevtyń ákesi Murat Tursynbaev
Apat tirkelgen ýaqyttan 1 saǵat ótkende Rasýl qaıtys bolady. Sot-medıınalyq saraptamaǵa súıensek, jigittiń mıyna qan quıylǵan. Biraq eskerer taǵy bir jaıt, advokattyń aıtýynsha, azamattyń denesiniń keı tusy kógergen. Al joǵaryda aıtqan Rasýldyń sońǵy tikeleı efırinde onyń eki júrgizýshimen sózge kelip qalǵany da taspalanǵan. Sondyqtan, ata - anasy apat aldynda balalardyń ózara tóbelesýi de múmkin dep otyr. Bul ázirge tek boljam ǵana.
«Áke-sheshesi kelip, keshirim surady. «Balamdy keshirińizshi, kómekteseıin» dedi. Men kerek emes dedim. Balamdy sońǵy saparǵa ózim attandyram», – dedi R. Tursynbaevtyń ákesi Murat Tursynbaev.
Al qorǵaýshy is áli de júrip jatqanyn, biraq kóp derek nazardan tys qalǵanyn aıtty.
«Atalǵan ispen tanystym. Advokat retinde bul is aýyr qylmysqa jatady. Óıtkeni qaıtys bolǵan balanyń denesinde kógergen jerleri bar. Biz qazir tolyq saraptamalardy júrgizýin talap etemiz», – dedi qorǵaýshy Aıda Danabekova.
Zańger tıisti beınetirkeýdi de ala almaı otyrǵanyn aıtady. Quzyrly organdardyń buǵan deıin bergen túsinikterine súıensek, avtokólik sheteldik nomermen tirkelgen, sondyqtan ony «Sergek» beınekamerasy arqyly baqylaý múmkin emes.
«Qylmystyq Kodekstiń 345-babynyń 3-tarmaǵy boıynsha tirkelip, qazirgi tańda anyqtaý basqarmasynyń qyzmetkerleri qylmystyq is aıasynda birqatar saraptamalyq zertteýler taǵaıyndady. Osy saraptamalyq zertteýlerdiń nátıjesi óndiriske kelgennen keıin Qylmystyq is júrgizý kodeksiniń 190-babyna sáıkes, is materıaldary sotqa jóneltiletin bolady», – dedi Almaty qalasy PD resmı ókili Saltanat Ázirbek.
Istiń ara-jigi ajyratylmady deýge áli erte. Óıtkeni buǵan deıin 2 sot otyrysy ótken. Alda áli birneshe tyńdalym bar.
"Adyrna" ulttyq portaly
