Saıasattanýshy Muhtar Seńgirbaı keshe Sankt-Peterbýrgte ótken jıyn Qasym-Jomart Toqaev úshin jarııa saıasat turǵysynan óte aýyr shara bolǵanyn aıtty, dep habarlaıdy "Adyrna" ulttyq portaly.
Ol bul týraly óziniń pikirin feısbýktegi paraqshasynda jazdy.
"Kórshisine agressııa jasap, búkil Batys áleminen bólinip qalǵan eldiń basshysymen sahnada qatar otyrdy. Iaǵnı, birneshe saǵat boıy batysqa qarsy mysqyl, kekesin, menmenshil rıtorıkany tyńdaýǵa májbúr boldy.
Onyń ústine jıyndy shovınıstik málimdemelerimen, sonyń ishinde Qazaqstanǵa qatysty qıturqy sózderimen belgili bolyp, «arnaıy operaııany» qoldaýshylardy basqaryp júrgen Margarıta Sımonıan júrgizdi. Eki aıǵa jetpeıtin ýaqyt buryn ǵana onyń kúıeýi, rejısser Tıgran Keosaıan Qazaqstannyń atyna aýyr aıyp taǵyp, birneshe málimdeme jasaǵan edi. Shara soǵysty aqtap, Batysty jamandaýǵa arnaldy. Qazaqstan basshysy sol uzaq-sonar agressııashyl málimdelerdi «tyńdaýshysy» boldy.
Uıymdastyrýshylar aldyn ala boljady ma, joq pa, Pýtın men Toqaevtyń sózderi bir-birin joqqa shyǵaratyn pikirsaıys boldy. Toqaev Ýkraınadaǵy soǵysty synamaǵanymen, Pýtınniń biraz sózin dıplomatııalyq túrde joqqa shyǵaryp, ashyq pozıııasyn aıtyp otyrdy. Sondaǵy eń batyl sózi – «LNR» men «DNR»-dy moıyndamaıtyny boldy. BUU jarǵysyna súıený arqyly ol Pýtınniń «halyqaralyq jarııa quqyqqa» siltep, soǵysty aqtaǵan sózine qarsy shyqty", — dep jazdy ol.
Saıasattanýshy Toqaev Qazaqstanda Ýkraınadaǵy soǵysqa qatysty árkelki pikir bar ekenin, elde «ashyq azamatty qoǵam ósip-jetilgenin» aıtý arqyly aqparattyq ızolıaııaǵa ushyrap, «soǵys» sózi úshin on jylǵa qamaıtyn zań shyǵaryp, oqshaýlanyp jatqan Reseıge qaraǵanda bizde áralýan pikir bar degendi meńzegendeı bolǵanyn atap ótti.
"Pýtınniń «Batys bermeı qoıǵan zattyń bárin basqa jaqtan alamyz ne ózimiz shyǵaramyz» degen sózine Toqaev birneshe ret qarsylyq bildirdi. «Qazirgi zamanda tolyq oqshaýlaný múmkin emes» dedi Qazaqstan basshysy. Qazaqstannyń egemendigine qatysty daýly málimdemeler jasaǵan Reseı depýtattaryna, Tıgran Keosaıanǵa qatysty málimdemesin Toqaev ádeıi aıtty. Oǵan bul jóninde suraq ta qoıylmaǵan edi. Iaǵnı Qazaqstan basshysy osyndaı «soǵysshyl atmosferanyń» aıasynda qalyp qoıatynyn bilip, sol sózin ádeıi daıyndap barǵandaı áser qaldyrdy", — dedi saıasattanýshy.
Eske sala keteıik, keshe Prezıdent Toqaev Reseıde «Jańa álem – jańa múmkindikter» atty Peterbýrg halyqaralyq ekonomıkalyq forýmynyń 25 jyldyǵyna arnalǵan jıynnyń plenarlyq otyrysyna qatysqan bolatyn.
"Adyrna" ulttyq portaly.
