«Dauletten» qaıyrymdylyq qory tarapynan qasıetti Ramazan aıynda «BALA-ShAǴAMEN SOLTÚSTIKKE» jobasy bastaý alǵan bolatyn. Joba barysynda 5 otbasyny Soltústik óńirge kóshirý josparlanǵan. Nátıjesinde, 7 maýsym kúni «Dauletten» qaıyrymdylyq qory 5 otbasyǵa qonys toı jasap, aýyl meshitinde erýlik berdi.
Bul týraly qoǵam belsendisi Býrahan Daqanov ta súıinshilep, Facebook paraqshasyna jarııalady.
“Al súıinshi aǵaıyn. Dáýletten kóshirgen 5 otbasy túgel derlik Soltústik Qazaqstan oblysy Shal aqyn aýdanyna qonystandy. Teriskeıge 36 adam qostyq. Keshe Dáýlettenniń ózi kelip, qonys toılaryna qatysty. Bárimiz rızamyz.
Óz basym qatty qýanyp otyrmyn. Osydan biraz ýaqyt buryn, Dáýletten 5 otbasyna úı alyp berip, aýyldarǵa kóshirmek degendi estı sala, barymdy salyp, ol otbasylardy Soltústikke, Shal aqyn aýdanyna kóshirýge tyrystym. Jatpaı turmaı júgirdim desemde bolady. Osy feısbýktaǵy dostarym oǵan ózderińizde kýásizder. Endi mine, Táńir qoldap maqsatym oryndaldy. Nátıjesinde, Shal aqynǵa 10 eresek, 17 mektep jasyndaǵy oqýshylar jáne 9 balaqaı kóship keldi. Tómendegi sýret tolyq emes, degenmen bir aýyl, bir qaýym bop turǵany kórinip tur. Báriniń de kózderin de ot, júregi tolǵan qýanysh. Menińde eki ezýim eki qulaǵymda otyr. Sebebi, qolymyzda bılik bolmasa da, bir emes, eki emes, 36 Qazaqtyń Soltústik Qazastanǵa qonystanyp, úıli bolýyna olardyń ómirge degen jańa qulshynysyn oıatýǵa sep boldyq”, - dedi ol jazbasynda.
Sondaı-aq, ol qansha qarjy jumsalǵanynda aıta ketti.
“Dáýlettenniń bul jobasy, ıaǵnı 5 otbasyny Soltústikke kóshirgeni, 5 otbasyna úı alyp, otyn sýyna deıin daıyndap bergeni tipti bızness bastasyn dep 1 mıllıonnan aqsha bergeniniń bári bári aınalyp kelgende 34 mıllıon teńgeniń aınalasynda bolatyn qarjy jumsaldy. Al sol 30 mıllıon teńgeni at qyp minip júrgen Qazaqtyń baılary qanshama.. Mine osy jazbany sol kisiler kórse eken..
Negizi, basqasy basqa, myna ózim turyp jatqan Shal aqyn jerinde satylymda turǵan úıler jeterlik. Qundary shamamen 2,5 mıllıonnan- 6 mıllıon teńgege deıin úıler bar. Onyń ústine kórshiles, bosap qalǵan aýyldarda quny 500 myń teńgege jetpeıtin úıler bar. Bir mıllıondy remontqa sal da, emin erkin tura ber. Qysqasy, biz keldik aǵaıyn, siz de kelińiz. Bizge kórshi bolyńyz. "TÁUEKEL". Teriskeı bizge amanat!!!! ”,- dep qýanyshyn bildirdi.
“Adyrna” tilshisi «Dauletten» qaıyrymdylyq qory arqyly Soltústikke kóship barǵan otbasylarmen de tildesti.
Maqulbekov Murat Baqtybaıuly «Dauletten» qaıyrymdylyq qory uıymdastyryp otyrǵan jobaǵa qatysyp otbasymyn Soltústikke bıznes bastaýǵa, baspana alyp, ómirin jaqsartýǵa joldama utyp aldy. Ol 19 jyl boıy ınformatıka pániniń muǵalimi bolyp qyzmet atqarǵan.
“Bulda bir bizge Allanyń bergen kómegi bolar. Sebebi, Almaty qalasynda neshe jyl pəter jaldap turdyq. Mynaý jobanyń bir jaqsy baǵyty bul jerde barlyq adamnyń turatyn jaǵdaıyna tolyq jan-jaqty qarasyp, kómektesip otyr. Dəýlet myrzanyń buny oılap, uıymdastyryp otyrǵanyna rıza bolamyz. Sebebi, qarap tursańyzdar kóshi-qonnyń barlyq shyǵyndaryn kóterip aldy. Basymyzǵa baspana alyp berdi. Bıznes bastaýǵa 1mln qaıtarymsyz qarajat bermekshi jəne 6 aı boıy 60 000 tg-den járdemaqy tólep otyrady. Mynaý baý-baqsha, dəndi-daqyl egemiz deseńizder oǵanda kómektesip jatyr. Otyn-kómirine deıin túsirip berip otyr. Odan bólek bala-shaǵaǵa kúzgi ýaqytta sabaqqa barar aldynda taǵy da mektepke kerek qural-jabdyqtaryn alyp bereıin dep otyr. Qaı memlekette bar, qarap kórińizdershi, qaı memleketke kómek kórsetilip jatyr? Halyqtyn qamyn oılaǵan bul joba keıin úlken jobaǵa aınalatyn bolsa, osy Soltústik óńirdi qazaqlandyrý saıasaty qarqyndy damyp ketpek. Osy Soltústik óńirde bos turǵan úıler kóp eken. Mal baǵyp mal ósirem degen adamdarǵa jaıylymy keń, topyraǵy qunarly tek qana tek qysy qataldaý degeni bolmasa, al qalǵan adam ómirine degen tabıǵattyn da kómegi óte zor bolyp tur. Qoryqpaı Soltústik óńirge kóshýge shaqyramyn”, - dedi Murat.
Sonymen qatar, Shymkent qalasynan Soltústikke kóship kelgen Satybaldıeva Álııa da óz rızashylyǵyn bildirýde.
“Biz Dáýletten bastaǵan qaıyrymdylyq jobasy arqyly 1311 ótinimniń ishinen tańdalǵan otbasymyz. 5 otbasy tańdaldy,sonyn biri biz. Bizge Sergeevka qalasynan baspana berdi. Bul jerdiń tabıǵaty, aýasy keremet, adamdary kishipeıil,qarapaıymdylyǵy bizge unap jatyr. Biz burynnan turatyn adam sekildi tez úırenisip kettik. Alǵysym sheksiz. Bizde meshitte erýlik berildi, erýlik as berildi. Bizge osyndaı kishipeıildilikpen kómek qolyn sozyp jatyrǵan adamdarǵa qatty qýandyq. Aldaǵy ýaqytta keletin otbasylarǵa biz mindetti túrde jol kórsetemiz. Bizdiń páter jaldap turatyn týystarymyz, jan-jaqtaǵy dostarymyz, bizge baılanysqa shyǵyp jatyr. Qysynan qorqýda, alaıda, eń bastysy nıeti túzý, ómirge qulshynysy bar, pysyq bolsań barlyq jerden ebin taýyp, ómir súrip ketýge bolady. Əreketke-bereket deıdi ǵoı barlyǵyn jasaýǵa bolady”,- deıdi Álııa.
Álııa barlyq muqtaj jandarǵa áreket etseńizder bári bolady deıdi.
“Sharshadym, anaý joq mynaý joq ol jaı syltaý. Oǵan sizder eńbektenip,tyńbaı uıyqtamaı solaı jasasańyzdar,onyn barlyǵy ózi sizge bireýden suramaı-aq aldyńyzǵa keledi. Eń bastysy Alladan suraý kerek. Men ózim 12 jyl kvartırada turdym. 2 jyl boljy teledıdarymyz joq. Mine, Allaǵa shúkir, baspanaly bolyp jatyrmyn, qudaı qalasa teledıdarymda bolady. Eń basty eńbektenýimiz kerek,jalqaý bolmaýymyz kerek. Men Shymkent qalasynda turǵan kezde pırojkı pisirip, eki jerdiń polyn jýatyn edim. Bala-shaǵamdy sabaqqa shyǵaryp salyp, keshkisin kútip alyp, keshkisin taǵy baryp pol jýyp kelemin. Túnde zagotovkamdy daıynadap, tańerteń qaıtyp kelem, kúnim solaı ótedi. Əri bala-shaǵamnyń aldynda, əri kúndelikti azyq-túligimizdiń aqshasy túsip solaı ómir súrdik. Endi Allaǵa sansyz shúkir dep aıtaıyn, osyndaı joba arqyly oıda-joqta Soltústik mekenge kelip, osyndaı baspanaly bolyp jatyrmyn. Rahmet!”, - dep qýanyshyn bildirdi.
“Adyrna” ulttyq portaly
