27 mamyr kúni Taraz qalasyndaǵy Jastar alleıasynda «NEET jastarynyń qundylyǵy » taqyrybynda kezdesý ótti.Kezdesý «Jastardy áleýmettendirý jáne ońaltý» jobasy aıasynda jalǵasyn tapty. Joba jastardyń jumys jáne oqýǵa kelgende belsendilik tanytpaý sebepteri, jobalyq keńse tarapynan jastarǵa kómek berý jáne kásibı baǵdarlaý túrleri, NEET jastarynyń qordalanǵan máseleleriniń sheshý joldaryn qarastyrýǵa baǵyttalǵan. Osyǵan baılanysty, Taraz qalasynyń jumyspen qamtý jáne jastar resýrstyq ortalyǵymen birlese otyryp NEET jastaryna arnaıy jármeńke de uıymdastyryldy.
Jambyl oblysy ákimdigi jastar basqarmasy, búgingi tańda Taraz qalasy men aýdandarynda 11 orynda bos jumys oryndar jármeńkesin uıymdastyrýda. Jármeńkede 150-ge jýyq jumys berýshiler qamtylyp otyr. Onyń ishinde 410-ǵa jýyq bos jumys oryndary usynylady deıdi Jambyl oblysy ákimdigi jastar saıasaty máseleleri basqarmasynyń basshysy Serikbol Berikqoja.
«Taraz qalasynyń ózinde atalmysh jármeńkege 3000-ǵa jýyq jumyssyzdarǵa qatysýǵa shaqyrtý berilgen bolatyn. Bul jumystar qala aýdandarynda da qamtylýda. Qazirgi tańda Jambyl oblysynda 258 myńǵa jýyq jastar bar. Sonyń ishinde jastar saıasaty óz jumysyn osy jumyssyzdyqpen kúreske basa nazar aýdarady. Jalpy oblysta jastardy damytýǵa arnalǵan negizgi baǵyttar nazarǵa alynyp, jumystar atqarylýda»,- deıdi Serikbol Berikqoja.
Aǵymdaǵy jyldyń basynan Taraz qalasy ákimdiginiń halyqty jumyspen qamtý ortalyǵyna 1400 jas qaıyryldy. Qazirgi tańda ol jastardyń ishinde 801 azamat NEET sanatyndaǵy jastar quramyna kiredi. Olardyń basym bóligin júmyspen qamtý ortalyǵy jumysqa beıimdep jatqanyn aıtty.
«Ol azamattardyń ishinen 624 azamatty turaqty jumys jáne jumyspen qamtýdyń belsendi sharalaryna tartyp otyrmyz, ıaǵnı jumysty 77.9%-ǵa oryndadyq. Aldaǵy ýaqytta da NEET sanatyndaǵy jastardy jumyspen qamtý maqsatynda bizdiń ortalyqta óte kóptegen jumystar júrgiziledi», _- deıdi Taraz qalasy ákimidiginiń halyqty jumyspen qamtý ortalyǵy dırektorynyń orynbasary Qabylqulov Nurlan.
Is-shara barysynda jastardy bolashaq ómirlik josparlaryna yntalandyrý jáne shyǵarmashylyq áleýetti damytý maqsatynda ómirin kásippen órnektegen bıznesmen Abdramanov Marsel jastarǵa mansap jáne jeke ósý úshin ómirlik daǵdylardy damytýdaǵy tájirıbeleri men jibergen qatelikteri jóninde aıtyp berdi.
«Men alǵashqy kásibimdi hot-dog satýmen bastadym. Eshkimnen uıalǵan joqpyn. Sóıtip qatelikterden sabaq alyp, tynbaı eńbektenip, úlken bızneske aıaq bastym. Qazir kóp jastar birden úlken bıznes ashqysy keledi de aspanǵa qarap otyrady. Hot-dog sat, nan sat deseń arlanady. Kez-kelgen jumystan arlanbaı bastap ketseń, sońynda jemisin kóresiń», - deıdi kásipker.
Kezdesý barysynda kásipker komandasyna úsh kadr tapshylyǵy bar ekenin aıtty. Sonymen qatar birge jumys istegisi keletin jastarǵa bos jumys orynyn usyndy. Odan bólek, jármeńkege kelgen NEET sanatyndaǵy Janǵazıeva Gúlnazııa jumyspen qamtyldy.
«Búgin men bos jumys oryndar jármeńkesine kelip turmyn. Qazirgi tańda jastar praktıkasy boıynsha Taraz mamandandyrylǵan kolledjine jumysqa turyp jatyrmyn. Meniń qujattarymdy qarastyrý ústinde. Ótken jyly Jambyl polıtehnıkalyq kolledjin támamdadym. Bir jyl boıy jumyssyz júrdim. Buıyrtsa, baǵdarlamashy mamandyǵy boıynsha jumysqa turyp ketemin degen oıdamyn», deıdi Jambyl polıtehnıkalyq kolledjiniń túlegi Janǵazıeva Gúlnazııa.
