Qyrǧyzstan zeinetaqy aqşasymen ipotekany jabuǧa rūqsat ettı. Mūndai şeşımdı ministrler kabinetı qabyldady, dep habarlaidy “Adyrna” ūlttyq portaly.
Mūndai mümkındıktı paidalanu üşın qorda kemınde 50 myŋ som (626 dollar) boluy tiıs.
Qyrǧyzstan zeinetaqy jüiesı bazalyq jäne jinaqtau bölıkten qūralǧan. Ai saiyn jūmys ısteitın ärbır qyrǧyz azamaty jalaqysynyŋ 10 paiyzyn zeinetaqy jarna retınde qūiady. 8 paiyzy qazırgı zeinetkerlerdı qarjylandyratyn memlekettık qorǧa tüsedı, 2 paiyzy memlekettık jinaqtau zeinetaqy qoryna barady, ol qarajat azamattyŋ özınde qalady. Ministrler kabinetı qyrǧyz azamattaryna osy memlekettık jinaqtau zeinetaqy qoryna tüsken qarajatty paidalanuǧa rūqsat berıp otyr.
Qyrǧyzstanda zeinetaqy jüiesı 2010 jyly engızılgen.
Osyǧan deiın Qazaqstan bilıgı de azamattarǧa zeinetaqy aqşasyn baspana jäne densaulyq mäselesın şeşuge paidalanuǧa rūqsat bergen bolatyn. Alaida osy säuırden bastap onyŋ talaptary küşeitılgen.
“Adyrna” ūlttyq portaly
