Pavlodarda jeke sot oryndaýshylar kepildikke qoıylǵan 40 úıdi bir ǵana adamǵa satqan. Ári naryqtaǵy baǵadan 5 ese arzanǵa saýdalaǵan, dep habalaıdy “Adyrna” ulttyq portaly astanatv.kz-ke silteme jasap.
Baspanasynan aıyrylyp qalǵandar buǵan kúdikpen qaraıdy. Munyń artynda uıymdasqan qylmystyq top tur deıdi. Úıiniń aýkıonǵa qoıylǵanyn tipti úı ıesi de bilmeı qalǵan jaǵdaılar kezdesken.
Aqylbek Silámov burynǵy úıinde 17 jyl turǵan. Baspanany nesıege satyp alyp, negizgi qaryzdy tólegen. Alaıda, 5 mln teńge bereshek qalǵan kezde qarjylyq qıyndyq týyndap, tóleı almapty. Osy kezde jeke sot oryndaýshylar úıdi nebári 5 mln teńgege baǵalap, satyp jibergen.
«Biz aýkıonnyń ótkenin de bilmeı qaldyq. Sot oryndaýshysy kelip, úıdi bosatyńyzdar degende ǵana bildik. Kýdıenko degen azamatqa 5 mln. teńgege satyp jiberipti. Al, bul úıdiń naryqtaǵy baǵasy 25-35 mln teńge turady», – deıdi Pavlodar qalasynyń turǵyny Aqylbek Silámov.
Basyndaǵy baspanasynan aıyrylǵan turǵyndar úıleriniń tym arzanǵa satylǵanyna qarsy. Aıtýlarynsha, 40 páterdi tek bir ǵana adam satyp alǵan. Zardap shegýshiler bul istiń artynda uıymdasqan qylmystyq top turǵanyna senimdi.
«Mysaly, meniń páterim 12 mln teńgeden turǵan kezde 2 jyl buryn 4 mln-ǵa satyp alǵan. Bir azamat 30-40 páterdi satyp alady menshikke. Ári qaraı ózi satady. Ol múmkin be, qazirgi jaǵdaıda? Ol múmkin emes, qazirgi jaǵdaıda. Ol múmkin – sybaılastyq bolsa», – dedi Pavlodar qalasynyń turǵyny Erlan Jakeev.
Aýkıonǵa qoıylǵan baspanalar naryqtaǵy baǵadan 5 esege arzan satylǵan. Al zań boıynsha úıdiń baǵasyn tek 25 paıyzǵa ǵana túsirýge ruqsat berilipti.
«Satylymǵa shyǵarylǵan múliktiń baǵasy aldymen ósedi. Al, eki márte satyp alýshy bolmasa, onda túse bastaıdy. Biraq naryqtaǵy qunynan 25 paıyzǵa ǵana arzan satylýy kerek. Ákimshilik isti qaraǵan kezde satyp alýshynynyń birneshe aýkıonǵa qatysqan kezderi boldy. Zańda oǵan shekteý joq», – dedi Pavlodar oblystyq mamandandyrylǵan aýdanaralyq ákimshilik sotynyń sýdıasy Gúlmıra Júsipova.
Jeke sot oryndaýshylardyń óńirlik palatasy bul máselege qatysty qandaı da bir aqparat berýge qulyqsyz. Amaly taýsylǵan turǵyndar taǵy da sottaspaq nıette. Al odan nátıje bolmasa, bas qaladan ádildik izdeýge bekinip otyr.
”Adyrna” ulttyq portaly
