Jaryssözge şyqqan kerekulıkter kezek-kezek pıkır bıldırıp jatty. Qazaqstan Jazuşylar odaǧy Pavlodar oblystyq filialynyŋ direktory Arman Qani tarihi derekpen būltartpas uäj keltırdı. — Qūrmettı jerlester! Men Kutuzovtyŋ ūly qolbasy ekenın tüsınemın, bıraq Qazaqstan üşın emes, Resei üşın (du qol şapalaq). Onyŋ Qazaqstanǧa eşqandai qatysy joq. Pavlodarǧa tıptı bes qainasa sorpasy qosylmaidy. Būl jerge Napoleon emes, joŋǧarlar şabuyl jasaǧan. Joŋǧarlardan bızdı Malaisary, Oljabai, Jasybai syndy batyrlar qorǧady. Ökınıştısı, olardyŋ eşbırınıŋ atyna Pavlodarda köşe berılgen joq. Ärine, men Kutuzov köşesın Täuelsızdık daŋǧyly dep özgertudı jaqtaimyn! — dedı aqyn. Täuelsızdık atauyna negızınen özge ūlt ökılderı, äsırese, etnikalyq orystar qarsy şyqty. Pavlodar tūrǧyny Liubov Dobrynina köşe atauyn özgertu ülken şyǧyn ekenın aita kelıp, «bilık sol aqşaǧa joldardy jöndep, köşenı körkeitsın» degen talap qoidy. Köşenıŋ būrynǧy atauyn qaldyru üşın: «Kutuzovtyŋ atasynyŋ aty – Qūtūz, tūqymy – türkı», — deuşıler de boldy. Al kerekulık jurnalist Esenbek Sanatūly: «Täuelsızdık atauyna qarsy adamdar – qazaqtyŋ täuelsızdıgıne qarsy adamdar», — dep tötesıne köştı. Pavlodardyŋ qūrmettı azamaty Ahmet Demesınov qaladaǧy Lermontov köşesıne Qonaevtyŋ esımın berudı ūsyndy. Jiyn soŋynda köpşılıktıŋ dauys beruımen Kutuzov köşesınıŋ atauyn Täuelsızdık dep özgertu maqūldandy. Qoǧamdyq tyŋdauda aitylǧan är pıkır hattamaǧa tırkeledı. Hattama jetı kün ışınde BAQ-ta jäne resmi internet-resurstarda jariialanady. Qajettı qūjattar onomastikalyq komissiiaǧa joldanady. _____________________________________________________________________________________________________________

qamshy.kz