پاۆلوداردا جەكە سوت ورىنداۋشىلار كەپىلدىككە قويىلعان 40 ءۇيدى ءبىر عانا ادامعا ساتقان. ءارى نارىقتاعى باعادان 5 ەسە ارزانعا ساۋدالاعان، دەپ حابالايدى “ادىرنا” ۇلتتىق پورتالى astanatv.kz-كە سىلتەمە جاساپ.
باسپاناسىنان ايىرىلىپ قالعاندار بۇعان كۇدىكپەن قارايدى. مۇنىڭ ارتىندا ۇيىمداسقان قىلمىستىق توپ تۇر دەيدى. ءۇيىنىڭ اۋكتسيونعا قويىلعانىن ءتىپتى ءۇي يەسى دە بىلمەي قالعان جاعدايلار كەزدەسكەن.
اقىلبەك ءسىلاموۆ بۇرىنعى ۇيىندە 17 جىل تۇرعان. باسپانانى نەسيەگە ساتىپ الىپ، نەگىزگى قارىزدى تولەگەن. الايدا، 5 ملن تەڭگە بەرەشەك قالعان كەزدە قارجىلىق قيىندىق تۋىنداپ، تولەي الماپتى. وسى كەزدە جەكە سوت ورىنداۋشىلار ءۇيدى نەبارى 5 ملن تەڭگەگە باعالاپ، ساتىپ جىبەرگەن.
«ءبىز اۋكتسيوننىڭ وتكەنىن دە بىلمەي قالدىق. سوت ورىنداۋشىسى كەلىپ، ءۇيدى بوساتىڭىزدار دەگەندە عانا بىلدىك. كۋديەنكو دەگەن ازاماتقا 5 ملن. تەڭگەگە ساتىپ جىبەرىپتى. ال، بۇل ءۇيدىڭ نارىقتاعى باعاسى 25-35 ملن تەڭگە تۇرادى»، – دەيدى پاۆلودار قالاسىنىڭ تۇرعىنى اقىلبەك ءسىلاموۆ.
باسىنداعى باسپاناسىنان ايىرىلعان تۇرعىندار ۇيلەرىنىڭ تىم ارزانعا ساتىلعانىنا قارسى. ايتۋلارىنشا، 40 پاتەردى تەك ءبىر عانا ادام ساتىپ العان. زارداپ شەگۋشىلەر بۇل ءىستىڭ ارتىندا ۇيىمداسقان قىلمىستىق توپ تۇرعانىنا سەنىمدى.
«مىسالى، مەنىڭ پاتەرىم 12 ملن تەڭگەدەن تۇرعان كەزدە 2 جىل بۇرىن 4 ملن-عا ساتىپ العان. ءبىر ازامات 30-40 پاتەردى ساتىپ الادى مەنشىككە. ءارى قاراي ءوزى ساتادى. ول مۇمكىن بە، قازىرگى جاعدايدا؟ ول مۇمكىن ەمەس، قازىرگى جاعدايدا. ول مۇمكىن – سىبايلاستىق بولسا»، – دەدى پاۆلودار قالاسىنىڭ تۇرعىنى ەرلان جاكەەۆ.
اۋكتسيونعا قويىلعان باسپانالار نارىقتاعى باعادان 5 ەسەگە ارزان ساتىلعان. ال زاڭ بويىنشا ءۇيدىڭ باعاسىن تەك 25 پايىزعا عانا تۇسىرۋگە رۇقسات بەرىلىپتى.
«ساتىلىمعا شىعارىلعان مۇلىكتىڭ باعاسى الدىمەن وسەدى. ال، ەكى مارتە ساتىپ الۋشى بولماسا، وندا تۇسە باستايدى. بىراق نارىقتاعى قۇنىنان 25 پايىزعا عانا ارزان ساتىلۋى كەرەك. اكىمشىلىك ءىستى قاراعان كەزدە ساتىپ الۋشىنىنىڭ بىرنەشە اۋكتسيونعا قاتىسقان كەزدەرى بولدى. زاڭدا وعان شەكتەۋ جوق»، – دەدى پاۆلودار وبلىستىق مامانداندىرىلعان اۋدانارالىق اكىمشىلىك سوتىنىڭ سۋدياسى گۇلميرا ءجۇسىپوۆا.
جەكە سوت ورىنداۋشىلاردىڭ وڭىرلىك پالاتاسى بۇل ماسەلەگە قاتىستى قانداي دا ءبىر اقپارات بەرۋگە قۇلىقسىز. امالى تاۋسىلعان تۇرعىندار تاعى دا سوتتاسپاق نيەتتە. ال ودان ناتيجە بولماسا، باس قالادان ادىلدىك ىزدەۋگە بەكىنىپ وتىر.
”ادىرنا” ۇلتتىق پورتالى
