Qaırat Rysqulbekovti qaıtys bolarynan bir kún buryn tergeý ızolıatorynda monshaǵa aparǵan semeılik Maqsut Ospanov eshkimge aıtpaǵan derekterdi bólisti, dep habarlaıdy “Adyrna” ulttyq portaly “Aıqyn” basylymyna silteme jasap.
Maqsut Ospanov 1979-1991 jyldary Semeıdegi oqshaýlaý tergeý ızolıatorynyń starshına jasaǵynda konvoı, baqylaýshy, kapterık qyzmetterin atqarǵan. Aıtýynsha, Qaırat Rysqulbekovty monshaǵa qalaı aparǵany áli kúnge kóz aldynda.
«Áli kúnge deıin esimde. Saǵat 3 kezinde monshaǵa ózim ertip apardym, kıimin, bárin aýystyryp berdim. Saǵat 4-5 shamasynda kameraǵa kirgizdim. Tańerteń kelsem, túrmede aıǵaı-shý. Qaırat qaıtys bolypty. Ne bolǵanyn ózim túsinbeı qaldym», – deıdi ol.
Maqsut Ospanov Qaırattyń erekshe baqylaýdaǵa kamerada otyrǵanyn aıtady.
«Birkisilik kamerada otyrdy. 22 kamera – erekshe baqylaýdaǵy kamera.«Smertnıkter kamerasy» dep alalatyn, onda atý jazasyna kesilgender otyrady», – deıdi Maqsut.
Burynǵy túrme qyzmetkeri buǵan deıin barlyq kitaptarda, baspa betterinde
«Qaırat Rysqulbekov Semeı túrmesindegi 21 kamerada ajal qushty» degen sózben kelispeıdi.
«Semeı túrmesinde 10 jyldan astam eńbek etken adammyn. Men jurt sekildi estigenimdi emes, kórgenimdi aıtyp otyrmyn. Qaıratty ózim kameradan alyp shyǵyp, monshaǵa aparyp júrdim. Menińshe, Qaırat óz ajalynan ólgen joq. Bireýler óltirdi. Al ony 21 kameraǵa aýystyrsa kúndiz aýystyrýy kerek edi. 22 kamerany ekiniń biri asha almaıdy. Jedel qyzmet bastyǵy men túrme bastyǵy ǵana asha alady. Qaıratty ózi otyrǵan 22 kamerada óltirip, 21 kameraǵa aparyp tastaýy da múmkin», – deıdi ol.
Sondaı-aq, Maqsut Ospanov Qaırat Rysqulbekovtyń kúndeligi jaıly estelik aıtyp berdi.
«Túrmedegi árbir kisiniń zattaryn, kıimin qoıatyn arnaıy oryn bolady. Qaırattyń qalyń dápteri sonda turatyn. Umytpasam, túsi qońyr bolýy kerek. Ishi tola jazý. Bir kúni «Kúndeligińdi oqýǵa bola ma?» dep Qaırattyń ózinen ruqsat suradym.«Oqyńyz. Biraq eshkimge bermeńiz», – dedi. Bireýge bersem, óz basyma bále bolady ǵoı. Sóıtip, Qaırattyń kúndeligin oqyǵan jaıym bar. Oqydym degennen góri sholyp shyqtym degenim durys shyǵar. Áke-sheshesine arnaǵan óleńderi, mahabbat taqyrybyndaǵy óleńderi boldy», – deıdi ol.
Qaırat qaıtys bolarynyń aldynda kúndelikti kamerasyna alyp ketken. Maqsut Ospanov oǵan kúndeligin ózi qıylyp suraǵan soń jasyryn túrde bergen eken.
«Qıylyp suraǵan soń amalsyz berdim. Bir jaǵy qoryqtym. Bilip qoısa, meni jumystan shyǵarýy da múmkin edi.«Qolyńyzdan aldym, qolyńyzǵa beremin. Tańerteń alasyz», – dedi. Tańerteń anadaı jaǵdaı boldy. Kúndelik sol kúıi tabylǵan joq. Keıin tabyldy dep estidim. Ózim biraq kórgen joqpyn. Osylaı bolaryn bilsem, dápterdi kóshirip alar edim. Ol kezde fotoǵa túsirip alatyn uıaly telefon da joq qazirgideı», – deıdi estelik aıtqan burynǵy túrme qyzmetkeri.
Qaırat qaıtys bolǵanda ony jalǵyz ózi monshaǵa aparǵany úshin Maqsuttan da kúdiktenip, suraqtyń astyna alǵan kezder de bolypty.
«Sen eshteńe kórgen joqsyń, monshaǵa apardyń da alyp keldiń. Aýzyńdy jap ta tynysh júr», – dedi bastyqtar. 10 jyldaı eshkimge aıtpaı júrdim. Qazir aqyryndap aıtyp júrgen jaıym bar», – deıdi Maqsut Ospanov.
