14 mamyrda Mäskeude üi qamaqta otyrǧan Jomart Ertaev Qazaqstan azamattyǧynan bas tartuǧa aryz jazdy. Būl turaly Today.kz tılşısıne Ertaevtyŋ advokaty, mäskeulık "Leksum" advokattar kollegiiasynyŋ basşysy Aleksei Petrov mälımdedı.
"Bız bügın Qazaqstan azamattyǧynan bas tartuǧa aryz jazdyq", – dedı Petrov.
Aleksei Petrov jelıge taraǧan Jomart Ertaevtyŋ öz aryzy ekenın rastady. Tūtqyndaǧy bankir qylmystyq ıske qatysty öz ūstanymyn aityp, azamattyqty ne üşın auystyrǧysy keletının tüsındırgen bolatyn.
Ertaev "Qazaqstan men Resei prezidentterınıŋ ortaq ekonomikalyq, mädeni, qūqyqtyq jäne aqparattyq keŋıstık qūruǧa baǧyttalǧan saiasattaryn ünemı qoldap kelgenın, qoldai da beretının" aitty. Bankir integrasiialyq prosesterdıŋ belsendı qatysuşysy boludy ünemı qalaǧanyn, bıraq saiasatpen ainalyspaǧanyn, ainalyspaitynyn da mälımdedı.
"Mäskeude üş jyl tūryp, integrasiianyŋ maŋyzdy bölıgı bolyp tabylatyn jobany damytyp jatyrmyn: bız Qytaidan Batys Europaǧa baǧyttalatyn telekommunikasiia torabyn qūrudamyz, auqymdy jobanyŋ bırınşı kezeŋı – Qazaqstan men Resei arasyndaǧy torap. Būl jobanyŋ ekı memleket üşın de qanşalyqty maŋyzdy ekenın tüsınemın, jastarymyzǧa qandai bolaşaq beretının ūǧynamyn, aldymda maŋyzy zor mäsele tūrdy. İntegrasiialyq prosesterdı barynşa tiımdı basqaru üşın Reseige köşu şeşımın qabyldauǧa mäjbür boldym. Sondyqtan üş jyl būryn Reseige köşıp, Resei Federasiiasy aumaǧyndaǧy zaŋ talabyna qatysty äreketterdı bastadym. Uaqytşa tūruǧa aryz jazyp, keiın zaŋǧa säikes merzımde RF azamattyǧyn aluǧa aryz berdım. Zaŋǧa baǧyna otyryp, Qazaqstan Respublikasy azamattyǧynan şyǧu şeşımın qabyldauǧa mäjbür boldym, öitkenı ekı eldıŋ azamattyǧyn qatar aluǧa tyiym salynǧan", – dedı Jomart Ertaev.
Ol QR IIM baspasöz mälımdemesındegı sözderdı mysalǧa keltıre otyryp, özıne taǧylǧan barlyq aiypty joqqa şyǧardy.
"Jurnalister men barlyq qyzyǧuşylyq tanytqan adamnyŋ nazaryn mynaǧan audarǧym keledı, Resei men Qazaqstannyŋ qylmystyq Kodeksterınde "lobbizm" degen qylmys joq. Osylaişa men eşqaşan Bank RBK-da jūmys ıstegen joqpyn, ūiymnyŋ ştatynda bolǧan emespın, ol jaqtan ailyq almadym, bank aksionerlerdıŋ qūramynda bolmadym, būny aşyq derekközden tekseru oŋai. Säikesınşe nesie beru jūmysyna yqpal ete almaityn edım, bıreudıŋ qyzyǧuşylyǧyna orai jūmys ısteitındei mümkındıgım bolǧan joq", – dedı Ertaev.
Esterıŋızge salaiyq, Mäskeude 8 mamyr künı Qazaqstan IID İnterpolynyŋ Ūlttyq ortalyq biurosynyŋ saualymen bankir Jomart Ertaev ūstaldy.
Ertaevtyŋ asa ırı kölemde alaiaqtyq jasaǧany üşın halyqaralyq ızdeude jürgenı aityldy.
Ol Bank RBK AQ direktorlar keŋesınıŋ töraǧasy bola tūryp jalǧan JŞS-nyŋ 80 million AQŞ dollaryn bankten qaryz retınde aluyn maqūldaǧan. Sondai-aq qaryzdy qaitarmauǧa yqpal etetın äreket jasaǧan.
Reseilık BAQ Mäskeude bankirdıŋ ūstalǧanyn habarlaǧan edı. Today.kz oqyrmanǧa Jomart Ertaevtyŋ ömır jolynan üzındı ūsyndy.
Keibır sarapşylardyŋ sözınşe, Ertaevta öte maŋyzdy aqparat bar, būl aqparat qazaqstandyq bankterdı qūrtyp jıbere alady.
Qazaqstandyq bankirdıŋ Resei azamattyǧyn aludy sūraǧany belgılı boldy.
______________________________________________________________________________________________________________ today.kz
Ūqsas jaŋalyqtar
