Bilim jáne ǵylym mınıstri Ashat Aımaǵambetov «Jedel jeli» baǵdarlamasynda qonaqta bolyp, muǵalimderdi artyq qujat toltyrýǵa májbúrleıtinderdiń jazaǵa tartylatynyn eskertti, dep habarlaıdy «Adyrna» ulttyq portaly.
«Qazir bilim oshaqtarynda ustaz mektepte nebári 2 qujat toltyrady. Olar: elektrondy júıede oqýshyǵa baǵa qoıý jáne kúndelikti sabaq josparyn ázirleý. Al elektrondy kúndelikti qosymsha qaǵaz betine basyp shyǵarý – zań buzýshylyq», – dedi mınıstr.
Sońǵy jyldary muǵalimderdi artyq qujat toltyrýǵa ıtermelegen 700-den astam tulǵa ákimshilik jaýapkershilikke tartylǵan.
«Ár mektepte pedagogıkalyq etıka boıynsha keńesterdi qurdyq. Bul – bir. Eger ol pedetıka keńesine barǵysy kelmese, oblystarda Baqylaý departamentteri bar, solarǵa telefon soǵyp nemese vatsapqa aqparat berýge bolady. Barlyq osyndaı shaǵymdar boıynsha biz mindetti túrde jaýapkershilikke tartamyz», – QR Bilim jáne ǵylym mınıstri Ashat Aımaǵambetov.
”Adyrna” ulttyq portaly
