Aqtaýda 500-ge jýyq jumysshy narazylyqqa shyqty

1973
Adyrna.kz Telegram
Foto: KTK telearnasy
Foto: KTK telearnasy

Aqtaýda kóshe sypyrýshylar narazylyqqa shyqty. 500-ge jýyq kommýnaldyq mekeme jumysshylary jalaqy kóterýdi talap etýde. Tipti janaıqaıyn jetkizý úshin joldy jaýyp tastady. Bul týraly KTK telearnasy málimdedi, dep habarlaıdy “Adyrna” ulttyq portaly.

«Báriniń úıi joq. Tańǵy saǵat 5te shyǵyp, úıine keshki 8-de qaıtady. Bári áıelder. Osy jerdegi erkekter daıyn tamaq pen daıyn tósekke barǵany bolmasa. Basynda ereýilge shyǵamyz dep oılamadyq. Aınalǵanda tenderdiń máselesi kúsheıip ketkennen keıin, sol sebepti osyndaıǵa keldik …», – deıdi tazalyqshylar.

Kún uzaqqa kóshe sypyryp qalanyń qoqysyn shyǵaratyndar áli kúnge naýryz aıynyń jalaqysyn almapty. Eki jyldan beri eńbek demalysyna da shyqpaǵan. Sondyqtan joldy jabýǵa deıin barǵan jumysshylar aılyqty 30 paıyzǵa ósirýdi talap etti. Al qala tazalaǵyna jaýapty mekeme basshylary kóshe sypyrýshylardyń aqshasyn jyl saıyn 10 paıyzǵa kóterip jatyrmyz dep aqtaldy.

Máselen, byltyr 67 myń teńgeden 83 myńǵa kóbeıipti. Al bıyl 90 myń teńgege jetti deıdi. Aldaǵy ýaqytta taǵy 6 myń teńgeden qosylady dep josparlaǵan. Biraq bıyl tender toqtap qalyp, qarjy qolbaılaý bolyp otyr deıdi.

«Biz memlekettik satyp alý konkýrsyn ótkizdik Aqtaý qalasy ákimdigi, úsh jylǵa. Memlekettik satyp alý konkýrsy boıynsha birneshe mekeme qatysyp, jeńimpaz anyqtaldy. Biraq memlekettik aýdıt mekemesi tekserip, birinshi konkýrstyń qorytyndysyn buzyp tastady. Keıin qaıtalap shyǵarǵan bolatynbyz. Qazir jeńimpaz anyqtaldy. Sonymen qatar qatysqan úshinshi mekeme aryz jazýyna baılanysty toqtap tur. Sol sebepten biz qala ákimdigi myna mekemege tıisti qarajatty tóleı almaı otyr», – deıdi Aqtaý qalasy ákiminiń orynbasary Alpysbaı Taýbaev.

Pikirler