Shymkent qalasyndaǵy jastar resýrstyq ortalyǵynyń jumysyn jetildirý úshin 5 baǵyt boıynsha jumys júrgiziletin bolady. Bul týraly qalalyq ishki saıasat jáne jastar isteri jónindegi basqarmasynyń basshysy M.Shotanov qala ákimine jastar resýrstyq ortalyqtarymen atqarylǵan jumystar jaıyn baıandaý barysynda aıtty.
«Birinshi jastardy áleýmettik qyzmettermen qamtý - oǵan 45 myńǵa jýyq jasty qamtý kózdelýde. Ekinshi 93 myńnan astam jasty volonterlik qyzmetke tartý bolsa, úshinshi eldiń qoǵamdyq saıası ómirine áıelderdiń rólin arttyrý úshin 30 is-shara ótkizý josparlanýda. Al, tórtinshi oqymaıtyn jáne jumyspen qamtylmaǵan jastar sanyn azaıtý, besinshi «Jasyl el» jobasyna jastardy tartý»,-ekenin aıtqan basqarma basshysy osy boıynsha júıeli jumystar atqarylatynyn atap ótti.
Osy jyldyń birinshi toqsanynda qalada 25 qoǵamdyq, 12 qaıyrymdylyq, 44 aqparattyq is-sharalar uıymdastyrylyp, oǵan 7 myńǵa jýyq jas tartylǵan bolsa, volonterlik uıymdar men mektepter arasyndaǵy bekitilgen josparǵa sáıkes 62 is-shara uıymdastyrylyp, ol is-sharalarǵa 13 myń shamasynda jas qamtylǵan.
Baıandamashy jumys istemeıtin NEET sanatyndaǵy jastardyń úlesi ótken jyldyń qorytyndysy boıynsha 6,7 paıyzǵa tómendegenin, 2022 jyly bul kórsetkishti 6,5 paıyzǵa túsirý boıynsha jumystar júrgiziletinin aıtyp, jyl basynan 2066 jas jumyspen qamtylǵanyn málim etti.
Jıyn sońynda sóz alǵan qala ákimi Murat Áıtenov elimizde birneshe jyldan beri júzege asyrylyp keletin - jastardy qoldaý, olarǵa kásibı bilim berý, jumyspen qamtý sekildi baǵdarlamalardy keńinen túsindirýdi tapsyrdy. Sonymen birge megapolıs jastarynyń qolynan kóp is keletin eńbekqor jandar ekenin aıtyp, jumyssyz jastardy tereń zerdelep, olarǵa mamandyq boıynsha durys baǵyt-baǵdar berý jumysyn jandandyrýdy júktedi.
