Elbasy N.Á. Nazarbaevtyń «Bolashaqqa baǵdar: Rýhanı jańǵyrý» atty maqalasyna oraı
Rýhanı jańǵyrý – Ulttyń Uly Muraty! Uly murat jolynda tize qosyp, is qylý – bizdiń perzenttik hám azamattyq Uly boryshymyz. Al bul saparda jolymyzǵa qaqpan quryp, aıaqtan shalýshylar – Qazaqstannyń has jaýy.
RÝHANI JAŃǴYRÝ
Shyńǵa bıik El kóz tikse asqarly,
Shaıyr jazbaı, kim jazady dastandy?!
Súıinshi, Alash!
Tarıhyńda tolǵaýly
Rýh jańǵyrar jańa dáýir bastaldy!
Kók túriktiń urpaǵyna, ýa, qutty
Tý kóterer taǵy bir tań atypty.
Jolyn tappaı, qańǵyrǵan El qanshama,
Kodyn saqtaı, jańǵyrǵan El baqytty.
Bul jańǵyrý – órge bastaý Ultymdy,
Bul jańǵyrý – tórge bastaý Ǵurpymdy.
Ulttyq kodym – meniń ulttyq qulpym,
Kim kóringen qoldy etpesin kiltimdi.
Bul jańǵyrý – ulylardy ulyqtaý,
Uly Abaıdyń danalyǵyn umytpaý.
«Kisen ashyp» Qurmanǵazy kúıimen,
Bolmysymdy buljymastaı qulyptaý.
Bul jańǵyrý – kemeldenip jańǵyrý,
Keýde soqqan kúlli álemdi tań qylý.
Jyr alyby Jambyldardy jyr qylý,
Án alyby Shámshilerdi án qylý.
Bul jańǵyrý – bastamasy ǵajaptyń,
Bul jańǵyrý – astanasy lázzattyń.
Jalǵany kóp sahnasynda jahannyń
Mádenıetin moıyndatý qazaqtyń.
Bul jańǵyrý – tarıhı sát saýapty,
Saýapty iske bárimiz de jaýapty:
Tulparymyz ozsyn desek báıgede,
Urpaǵymyz bolsyn desek saýatty.
Bul jańǵyrý – Týǵan Jerdi túletý,
En dalanyń keń qushaǵyn gúl etý.
Shyǵys, Batys, Ońtústik pen Soltústik
– Bar qazaqtyń arman-jyryn bir etý.
Asýdy asyp Qazaqstan – ardaǵym,
Aspanmenen astasyp tur armanym.
Er bastady! El qostady! Jarylqa!
Táńir Iem, Týǵan Eldiń BAǴDARYN!
Serik SEIITMAN aqyn,
«Jas tulpar-2014» syılyǵynyń ıegeri.
