Ulystyń uly kúni naýryzdyń bastaýy - Amal merekesi alty alashtyń tórine keldi. Osynaý, tekti jurt úshin ulyq merekeni toılaý Jetisý jerinde bastalyp ketti. Oblystyq Bıken Rımova atyndaǵy drama teatrdyń ujymy, qazaq halqyna tán danalyqty kórsetip, óskeleń urpaqqa kóne merekeniń mán-mańyzyn uǵyndyrmaqqa jol saldy.
Jergilikti óner maıtalmandary eki topqa bólinip, Taldyqorǵan qalasyndaǵy bilim oshaqtaryna bas suǵyp, amandyq surasty.
Teatr ártisteri oblys ortalyǵyndaǵy №28 IT mektep-lıeıiniń, №1 Abaı, M. Lomonosov, D. Raqyshev atyndaǵy bilim oshaqtaryna baryp, ustazdary men oqýshylarymen kóristi.
Jetisý kógin 20-ǵa jýyq óner adamy áýezdi ánmen áýeletip, «Kórisý kúni» meıramynyń erekshelikterin dástúrge saı kórsetip baqty. Óz kezeginde oqýshylar, qos ishekten kúmbirletip kúı tógip, án salyp, «Qara jorǵa» bıin bıledi. Al, teatr serkeleri talaby taýdaı balalarǵa tátti-dámdini tartý etti.
Adamzattyń dúnıe-tanymyn qalyptastyrýdaǵy negizgi ınstıtýt – mektep. Sondyqtan da, teatr ujymy Amal merekesin dál osy mekemeden bastap, aıaǵyn aýqymdy sharaǵa ulastyrdy.
«Kórisý-halyq qystan aman-esen shyǵyp, kóktemniń shýaqty kúni bir-birimen qýana qaýyshqan, izgi nıet-tilegin jaýdyrǵan qazaqtyń ejelgi meıramy. Bul merekeniń basty maqsaty qazirgi óskeleń urpaqqa salt-dástúrimizdi, tilimizdi, dinimizdi, balalarǵa mıras etip qaldyrý. Sharaǵa mektep jasyndaǵy oqýshylar, jastar qaýymy jınaldy. Joǵary býyn ókilderi ejelden saqtalǵan dástúrdi kópke keńinen tanystyrdy»,-deıdi B. Rımova atyndaǵy drama teatrynyń dırektory Rýslan Isabekuly.
Aıta keteıik, B. Rımova atyndaǵy drama teatr ártisteri I. Jansúgirov atyndaǵy mádenıet saraıynda «Betashar», «Tusaý kesý», «Maı jaǵý» syndy qazaqtyń ata-dástúrinen sahnalandyrylǵan kórinis qoıdy. Sondaı-aq, balalar úıiniń tárbıelenýshileri úshin aq dastarhan jaıylyp, qonaqtar nazaryna úlken merekelik konert usynyldy.
