Aqtóbe oblysynyń ákimi Berdibek Saparbaev batys óńirde hıdjab máselesi qalaı sheshilip jatqanyna toqtaldy. Buryn óńirde 530 oqýshy hıdjab kıse, tıisti sharalardan keıin 33-i ǵana qalǵan. 

"Hıdjabqa qatysty zańǵa sáıkes júıeli túrde jumys júrgizip jatyrmyz. Bul máselege biz qoǵamdyq uıymdardy jumyldyrýymyz kerek. Bizde hıdjab kıetin balalardyń sany 530 bolatyn, qazir 33 oqýshy qaldy. Solardyń ata-analarymen túsindirý jumystaryn júrgizip jatyrmyz", — dedi oblys ákimi OKQ-de ótken baspasóz máslıhatynda.

Saparbaev talap barlyq balaǵa birdeı bolýy kerektigin atap ótti.

"Barlyq bala qazirgi zamannyń talabyna, múmkindigine saı bilim alyp, emin-erkin oınaýy kerek, sportpen shuǵyldanýy kerek. Buǵan múmkindik jasaý – bizdiń ata-ana retindegi paryzymyz, mindetimiz. Eger biz óz paryzymyzdy oryndamasaq, erteń balalarymyz óskende bizge renjıdi. Sebebi olar óz qatarlastarynan kem bolady. Biz buǵan jol bermeý úshin jumys istep jatyrmyz", — dedi aımaq basshysy.

_______________________________________________________________________________________________________________________________

sputniknews.kz