Jetisý ólkesinde «Balalar jyly» aıasynda 8-naýryz merekesi qarsańynda mektep oqýshylary, stýdentter jáne kásipqoı sýretshilerdiń týyndylarynan jınaqtalǵan «Anamnyń beınesi» atty kórme-baıqaýynyń jeńimpazdary anyqtaldy.
Igi sharanyń ótýine oblystyq mádenıet basqarmasy men «Kórkemóner galereıasy» muryndyq boldy. Baıqaýdy ótkizýdegi negizgi maqsat- anaǵa degen meıirimdi, súıispenshilikti arttyrý, rýhanı baılyqty molaıtyp, urpaqty ulttyq rýhta tárbıeleý.
Aıta keteıik, baıqaý qatysýshylary jas erekshelikteri men deńgeılerine qaraı toptastyrylǵan. Qylqalam sheberleriniń eń daryndysy júldeli orynnan tabyldy. Solardyń biri - Alnýra Tursynǵalı. Onyń ótkizgen jumysy mektep oqýshylary arasynda úzdik dep tanylǵan.
- «Men mundaı baıqaýǵa birinshi ret qatysyp turmyn. Bir degennen júldeli bolý erekshe sezim. Týyndyny 18 saǵat kóleminde saldym. Bar yqylasymdy aýdarǵan jumysymnyń oń baǵalanǵanyna qýanyp turmyn. Meniń sýretpen áýestengenime 1,5 jyldyń júzi boldy. Qazir tek qara qarandashtyń kómegimen beıneleımin. Bolashaqta maıly boıaýmen sýret salýdy meńgergim keledi»,-deıdi jas sýretshi Alnýra Tursynǵalı.
Almaty oblystyq mádenıet basqarmasynyń basshysy Márlen Qapashulynyń aıtýynsha, úshinshi jyl qatarynan ótkizilip otyrǵan kórkem sharanyń kópke bereri mol.
«Búgin sýretshiler arasyndaǵy baıqaý óz máresine jetti. Qylqalam sheberleriniń dodasyn aqpan aıynda jarııalaǵan bolatynbyz. Uzyn-sany 130 úmitker qatysty, onyń ishinde 10 stýdent, 21 kásibı sýretshi, qalǵandary mektep oqýshylary. Jalpy júlde qory -700 myń teńge. Aldaǵy ýaqytta osy tektes sharalar óz jalǵasyn tabatyn bolady. Máselen, Qabanbaı batyr men Eskeldi bıdiń 330 jyldyǵyn ushtastyra otyra plener ótkizý josparlanǵan»,-deıdi Almaty oblysy mádenıet, arhıvter jáne qujattama basqarmasynyń basshysy Márlen Kólbaev.
