«Anýsh» — memlekettik sporttyq tapsyrystyń aıasynda jan basyna qarjylandyrý júıesi boıynsha jumys isteıtin Shymkenttegi eń úlken sport kesheni. «Nursát» shaǵynaýdanynda ornalasqan bul keshende sporttyń 5 túri, atap aıtqanda, karate, taekvondo, dzıýdo, boks jáne erkin kúres boıynsha 1 200 bala jattyǵady.
—Qazir adamdar sportpen aınalysý balanyń densaýlyǵyna da, tárbıesine de paıdaly ekenin jaqsy túsinedi. Kúndelikti sport zalǵa keletin jetkinshekter túrli jaman ádetterden aýlaq bolyp, erik-jigeri men tabandylyǵyn shyńdaıdy. Bolashaqta mundaı balalar qıyndyqqa tózimdi, tek qana alǵa umtylatyn azamat bolyp ósedi. Sol sebepti ata-analardyń da, balalardyń da yqylasy kúshti. Bizde olardyń alańsyz ári qaýipsiz jattyǵýyna barlyq jaǵdaı jasalǵan, — deıdi «Anýsh» JShS-niń dırektory Erjan Besterekov.
Shymkent qalasy ákiminiń orynbasary Muqsut Isahovtyń aıtýynsha, memlekettik sporttyq tapsyrystyń aıasynda jumys isteý úshin 109 kásipkerden ótinim túsken. Talapqa saı kelgen 67 kásipkerdiń ótinimi maquldanǵan. Olar 137 sport kesheninde balalardy sporttyń 16 túri boıynsha jattyqtyryp jatyr. Taǵy 12 ótinim qaralyp jatsa, talapqa saı kelmegen 30 ótinim keri qaıtarylǵan.
—Bıyl 14 myń balaǵa bıýdjetten 2 mıllıard 323 mıllıon teńgeden astam qarjy bólindi. Ata-analardan 15 281 ótinish tússe, sonyń 13 700-imen kelisimshart jasalǵan. Osy baǵyt boıynsha Shymkent respýblıkada birinshi orynda tur. Bul — baǵdarlamanyń artyqshylyǵy ata-analar balasyn qaı sekııaǵa, qaı sport túrine beretinin ózi sheshedi, — deıdi qala ákiminiń orynbasary.
Balalar tek jekpe-jek túrlerine ǵana emes, ózge sporttarǵa da qyzyǵady. Máselen, «Basket Kids» seriktestigine qarasty h4 sport kesheninde 500 bala basketbolmen, 220 bala voleıbolmen aınalysady. Al, «Madeıra Mereı» sport kesheninde 384 jasóspirim júzýmen aınalysyp jatyr.
Kásipkerler memlekettik sporttyq tapsyrystyń aıasynda jan basyna qarjylandyrý júıesi boıynsha jumys isteýdiń tıimdi ekenin túsinip, osy baǵytqa bet burýda. Máselen, Abaı dańǵylynyń boıyndaǵy burynǵy «Yrys» toıhanasy sport kesheni bolyp qaıta jasaqtalǵan. Al, «Turan GHA» jáne «Otyrar» sport klýby» kompanııalary jańa, úlken ári zamanaýı sport keshenderin salyp jatyr.
Aıta keteıik, eger balańyzdy tegin óner úıirmesi nemese sport sekııasyna jazdyrǵyńyz kelse, www.artsport.edu.kz portaly arqyly ótinish berýińizge bolady.
