Shymkent qalasyndaǵy barlyq mektepterde jalpy 242 myńnan asa bala bilim alsa, olardyń 200 myńǵa jýyǵy osy jyly qosymsha bilimmen qamtylady. Bul týraly bilim basqarmasynyń basshysy J.Tájıeva qala ákimine 2022 jyly atqarylatyn jumystar jaıyn baıandaý barysynda aıtty.
Balalardy qosymsha bilimmen qamtý kórsetkishi ótken jyly 73,4 paıyzdy qurasa, bıyl 77,1 paıyzdy quraıtyn bolady. Qosymsha bilimmen qamtylǵan oqýshylar úlesin kóbeıtý úshin jan basyna qarjylandyrý esebinen mádenıet basqarmasy tarapynan 6000 bala, dene shynyqtyrý jáne sport basqarmasy tarapynan 14000 bala, bilim basqarmasy tarapynan 5000 balaǵa qarjy qaralyp, jalpy 25000 bala túrli úıirmeler men sporttyq sekııalarǵa qamtylatyn bolady. Sonymen qatar 60 tan astam mekteptiń sport zaldaryn jalǵa berý arqyly sporttyq sekııalar ashylatyn bolady. Odan bólek, jańadan zamanaýı «Oqýshylar» saraıynyń qurylysy bastaldy. Osy jumystardyń aıaqtalýymen 2025 jylǵa deıin oqýshylardy qosymsha bilimmen qamtý 100 paıyzǵa deıin jetpek.
Qosymsha bilimsiz balalardyń áleýetin tolyq ashý múmkin emes ekenin aıtqan qala ákimi Murat Áıtenov ár bala qosymsha bilimmen qamtylýy tıis ekenin atap ótip, nátıjege qol jetkizý úshin naqty tapsyrmalar júktedi.
«Ár balanyń sabaqtan tys úıirmeler men sekııalarǵa qatysý múmkindigi bolýy mańyzdy. Barlyq mektepte sportpen aınalysýǵa jaǵdaı jasalý kerek. Memleket basshysynyń tapsyrmasyna sáıkes balalardyń memlekettik tapsyrys arqyly jekemenshik uıymdarda da qosymsha bilim alýyna jaǵdaı jasalýda. Sondyqtan jekemenshik sporttyq sekııalar men shyǵarmashylyq úıirmeler sanyn arttyrý baǵytynda júıeli jumystar atqarylýy tıis», -dedi qala basshysy.
Basqarma basshysy pedagog mártebesi týraly zańǵa sáıkes qosymsha bilim berý qyzmetkerleriniń de eńbekaqysy jyl saıyn ósetinin jáne sanattar úshin qosymsha aqylary ulǵaıtylatynyn málim etti.
Shymkent qalasy ákimdiginiń baspasóz qyzmeti
