Shymkent ákimi shalǵaıda ornalasqan eldimeken turǵyndarymen kezdesti

2114
Adyrna.kz Telegram

Búgin Shymkent qalasynyń ákimi Murat Áıtenov halyqty tolǵandyrǵan máseleni birlese sheshý úshin qala ortalyǵynan shalǵaıda ornalasqan Eńbekshi aýdanyna qarasty Toǵys, Maıatas, Eltaı, Jylanbuzǵan, Aınatas turǵyn alabtarynyń turǵyndarymen kezdesti.

Ákimshilik ǵımaratta bolǵan kezdesýde qala ákimi turǵyndarmen ashyq dıalog quryp, olardyń máselesin tyńdady. Ondaǵy halyq bes eldi mekenge ortaq mádenıet úıin salyp berýdi, kabeldi ınternet jelisin tartýdy, Maıatas turǵyn alabyna qarasty Belterek, Kózdi ata, Nurlytań kóshelerindegi aǵyn sý men jaıylym jer máselesin kóterdi.

Al, Eltaı turǵyn alabynyń turǵyndary jańa mektep qurylysyn salyp berýdi aıtsa, aýyl belsendileri Maıatas, Jylanbuzǵan, Toǵys turǵyn alaptarynan ótetin «Badam» ózeni jaǵalaýlaryna betondy damba qoıyp, bekitý jumystaryn júrgizip, abattandyrýdy jáne Aınatastaǵy №126 mektepke qosymsha 100 oryndyq oqý korpýsyn salý jáne akt zal, sport zal, sheberhana qajet eken jetkizdi.

Shahar basshysy ókiletti organ basshylaryna turǵyndardyń shaǵymdary men ótinishterine erekshe kóńil bólýdi aıtyp, máseleni sheshý úshin sala jetekshilerine naqty tapsyrmalar júktedi.

«Memleket basshysy kez kelgen qıyndyqtardy sheshýde birinshi kezekte halyqtyń jaǵdaıyn oılap, olardyń turmys-tirshiliginiń jaqsarýyn basty nazarda ustaýdy tapsyrdy. Osy baǵytta jumys jasaýdamyz. Árbirińizdiń aıtqan usynystaryńyzben, ótinishterińiz nazardan tys qalmaıdy. Zań aıasynda qarastyramyz. Bizdiń mindetimiz ınfraqurylymdy jetildirip, ómir súrýge qolaıly orta qalyptastyrý»,-dedi M.Áıtenov.

Qala bıýdjetiniń 20 paıyzdan astamy megapolıstiń ınfraqurylymyn damytýǵa bólinetinin aıtqan shahar basshysy onyń ishinde basym kópshiligi shalǵaı eldi mekenderdiń ınfraqurylym máselesin sheshýge baǵyttalyp keletinin jetkizdi.

Shymkent qalasy ákimdiginiń baspasóz qyzmeti

Pikirler