پرەزيدەنت قاسىم-جومارت توقاەۆتىڭ «انا ءتىلى» اپتالىعىنا بەرگەن سۇحباتىن مۇقيات وقىپ شىقتىم. ونىڭ انا ءتىلىن دامىتۋ جولىندا وسى باسىلىمنىڭ قىزمەتكەرلەرىنە بەرگەن جوعارى باعاسىمەن كەلىسەمىن. شىنىندا، بۇل گازەت ومىرگە كەلگەن العاشقى كۇنىنەن باستاپ ءتىل ماسەلەسىن كوتەرىپ، ونىڭ مۇڭىن حالىققا دا، بيلىككە دە جەتكىزۋمەن كەلەدى. سوندىقتان پرەزيدەنتتىڭ گازەت قىزمەتكەرلەرىنىڭ ەڭبەگىنە جىلى لەبىز بىلدىرگەنى ورىندى دەپ سانايمىن.
پرەزيدەنت ءوز سوزىندە انا ءتىلىنىڭ مەملەكەتتىك مارتەبەسى تۋرالى ءوزىنىڭ ويىن اشىق ايتتى. شىنىندا بۇل ماسەلەدە باسقالاردى ەلەمەي، سىڭارجاق كەتۋگە بولمايدى. بىزدە قازىر قازاق حالقىنىڭ ۇلەسى كوپ بولعانىمەن ءتىلىمىزدىڭ ىقپالى تومەن ەكەنىن مويىنداۋىمىز كەرەك. ال اتتانداپ، ورىس ءتىلىنىڭ قازىرگى مارتەبەسىن تومەندەتىپ، قازاق ءتىلىن عانا جوعارى كوتەرمەك بولساق، ول تەرىس تيىمدىلىك بەرەدى. ويتكەنى، بەلسەندى ارەنادا جۇرگەن قازاقتاردىڭ كوبى انا ءتىلىن جەتىك مەڭگەرمەگەن. ونىڭ ۇستىنە بۇل بىزدەگى سەپاراتيۆتىك پيعىلدىڭ ورىستەۋىنە مۇرىندىق بولادى. سوندىقتان، كوپ نارسەنى دابىرايتپاي، جۇيەلى تۇردە ىستەگەن دۇرىس.
شىنىندا بىزدە قىزۋقىندىلىق پەن ۇرانداتۋشىلىق باسىم. ال وندايلارمەن تابىستى ناتيجەلەرگە قول جەتكىزۋ قيىن. ءبىز اقىلدى الىستان ىزدەمەي وزىمىزبەن تاعدىرى دا، تالقىسى دا كوپ حالىقتاردان الۋىمىز كەرەك. سونىڭ ىشىندە اسىرەسە، پرەزيدەنت ايتقانداي، وزبەكتەن ۇيرەنەمىز كوپ. ولاردىڭ ەپتىلىگى مەن يكەمدىلىگى قازىرگى زاماننىڭ سۇرانىستارىنا تولىق جاۋاپ بەرەدى. كەزىندە ولاردا دا بيلىك ورىندارىنان ورىسشا سويلەۋ تالاپ ەتىلدى، ولاردىڭ دا بارلىق ەليتاسى بالالارىن ورىسشا وقىتتى. الايدا ءوز تىلدەرىن ەشكىمى ۇمىتقان جوق، ءتىپتى بەرىك ىنتىماقتارىنىڭ ارقاسىندا وزگەلەردى وزدەرىنە يكەمدەپ الدى.
ال ءبىز ءوزىمىزدى ءوزىمىز كەم تۇتىپ، باسقالاردىڭ سوڭىنان دالاقتاپ كەتتىك. سونىڭ سالقىنىنان ءالى كۇنگە ارىلا الماي كەلەمىز. ادام بارلىق كەمىستىكتى الدىمەن ءوز بويىنان تاۋىپ، الدىمەن ءوزىنىڭ، جاقىنىنىڭ بويىنداعى سوندايلاردى جەڭسە – ءبارىن دە ەڭسەرۋگە بولادى. مەن ءتىل جاناشىرىمىز، مەملەكەتتىك ءتىلدى قولداۋ كەرەك، قورعاۋ كەرەك دەپ ايعايلاپ جۇرەتىن تالاي قۇربىمنىڭ بالالارى نەمەسە نەمەرەلەرى تەك قانا ورىسشا سويلەيتىنىن كورىپ تاڭ قالىپ جۇرەمىن. كەيبىرەۋلەرىنە جۇرتقا ءدارىس ايتپاس بۇرىن ءوزىڭنىڭ وتباسىڭدى تۇزەسەڭشى دەپ ايتىپ تا قالامىن. بىراق وزدەرىنە كەلگەندە وندايلار كوڭىل اۋدارمايدى دا، وزگەلەردىڭ جات تىلدە سويلەگەنىنە ىزا بولىپ جۇرەتىن قىلىقتارىنا تاڭ قالاسىڭ.
مەن پرەزيدەنتتىڭ سۇحباتىنداعى مىنا پىكىرلەرگە دە قاتتى ريزا بولدىم. مىسالى، ول قازاق ءتىلىنىڭ قوعامداعى قاجەتتىلىن ارتتىرۋ قاجەت دەدى. ول ءۇشىن مەملەكەتتىك قىزمەتكە كاسىبيلىگىمەن قوسا «قازاق ءتىلىن جاقسى بىلەتىن ازاماتتارعا باسىمدىق بەرۋ كەرەك»، دەدى. ناعىز بۇگىنگى كۇننىڭ تالابى وسى. سونىمەن بىرگە ول «قازاق ءتىلىن جاقسى بىلەتىن وزگە ۇلت وكىلدەرىن قولداۋىمىز كەرەك. ولاردى پارلامەنتكە، وكىلەتتى ورگاندارعا سايلاپ، مەملەكەتتىك قىزمەت جۇيەسىندەگى جوعارى لاۋازىمدارعا تاعايىنداپ، مەملەكەتتىك ناگرادالارمەن ماراپاتتاپ وتىرعانىمىز دۇرىس»، دەدى. بۇل دا وتە ورىندى. قازىر وزگە ۇلتتىڭ جاستارى اراسىندا قازاق تىلىندە تازا سويلەيتىندەرىن كورگەندە قاتتى ريزا بولامىن. مىنە، سولاردى بارىنشا قولداۋ كەرەك.
جالپى، پرەزيدەنت ق.توقاەۆتىڭ سۇحباتى - حالىققا وي سالاتىن، سالماقتى، تەرەڭ ويلى، جان-جاقتى پىكىرلەر. ول سانالى ادامداردى بەي-جاي قالدىرماسى انىق.
ساۋلە مالىكوۆا،
سولتۇستىك قازاقستان مەملەكەتتىك
ءارحيۆىنىڭ ديرەكتورى
