قازاقستان پرەزيدەنتى قاسىم-جومارت توقاەۆ ەلىمىزدەگى ەكونوميكالىق احۋال جونىندە كەڭەس وتكىزدى، - دەپ حابارلايدى اقوردا سايتى.
بۇگىن قازاقستان پرەزيدەنتى قاسىم-جومارت توقاەۆ ۇكىمەتتىڭ جانە مەملەكەت باسشىسىنا تىكەلەي باعىنىشتى ورگانداردىڭ جەتەكشىلەرىمەن كەڭەس وتكىزدى. وندا الەمدەگى قارجىلىق-ەكونوميكالىق احۋال جانە ونىڭ قازاقستان ەكونوميكاسىنا اسەرى جونىندە ماسەلەلەر تالقىلاندى.
پرەزيدەنت ۇكىمەتكە، ۇلتتىق بانككە جانە باسقا دا مەملەكەتتىك ورگاندارعا بىرقاتار ناقتى تاپسىرما بەردى. باستى تاپسىرما - مەملەكەتتىڭ حالىق الدىنداعى بارلىق الەۋمەتتىك مىندەتتەمەلەرىن تولىق كولەمدە ورىنداۋ.
قاسىم-جومارت توقاەۆتىڭ تاپسىرماسى بويىنشا، پرەمەر-ءمينيستردىڭ تىكەلەي باسشىلىعىمەن شۇعىل ارەكەت ەتۋ شتابى قۇرىلدى. داعدارىسقا قارسى ءىس-قيمىلدار جوسپارى ازىرلەنەدى، ءىرى كاسىپورىنداردا حالىقتى جۇمىسپەن قامتۋعا قولداۋ كورسەتۋ جونىندە ارنايى جوسپار دايىندالادى. پرەزيدەنت حالىقتى مۇمكىندىگىنشە كوبىرەك جۇمىسپەن قامتۋ ماسەلەسىن اسا ماڭىزدى دەپ سانايدى. ۇكىمەت 2020-2022 جىلدارعا ارنالعان رەسپۋبليكالىق بيۋدجەتتى ناقتىلاۋ جونىندە ۇسىنىس ەنگىزەدى. مەملەكەت باسشىسى بيۋدجەت شىعىندارىن قىسقارتۋ، وڭىرلەردە حالىقتى جۇمىسپەن قامتاماسىز ەتۋ، ەلىمىزدىڭ قارجى-ۆاليۋتالىق نارىعىن تۇراقتاندىرۋ، رەسپۋبليكالىق جانە جەرگىلىكتى بيۋدجەتتەردى وڭتايلاندىرۋ بويىنشا شارالار قابىلداۋ قاجەتتىگىن ايتتى.
ۇقساس جاڭالىقتار
