يراننىڭ بارلاۋ ءمينيسترى ەسمايل حاتيب جەكسەنبى كۇنى ەلدىڭ يزرايلگە قاتىستى ستراتەگيالىق، وپەراتسيالىق جانە عىلىمي سيپاتتاعى «قۇندى قۇجاتتار مەن مالىمەتتەر توپتاماسىن» قولعا تۇسىرگەنىن مالىمدەدى. ونىڭ ايتۋىنشا، بۇل قۇجاتتار جاقىن ارادا جاريالاناتىن بولادى. بۇل تۋرالى ول يراننىڭ مەملەكەتتىك اقپارات اگەنتتىگى IRIB-كە بەرگەن سۇحباتىندا ايتتى، دەپ حابارلايدى “ادىرنا”.
ونىڭ ايتۋىنشا، اتالعان اقپاراتتاردى الۋ مينيسترلىكتىڭ «بارلاۋ سالاسىنداعى ۇلكەن جەتىستىگى».
ءحاتيبتىڭ ايتۋىنشا، بۇل قۇجاتتار ءيزرايلدىڭ يادرولىق باعدارلاماسى، سونداي-اق اقش-پەن، ەۋروپامەن جانە باسقا ەلدەرمەن قارىم-قاتىناسىنا قاتىستى ماڭىزدى مالىمەتتەردى قامتيدى. ول كەيبىر بارلاۋ فايلدارىنىڭ يراننىڭ شابۋىلداۋشى الەۋەتىن ارتتىرا الاتىنىن
قۇجاتتاردىڭ يرانعا قالاي جەتكىزىلگەنى جونىندە ەگجەي-تەگجەيلى اقپارات بەرۋدەن باس تارتىپ، «ول ادىستەردىڭ ءوزى قۇجاتتار سەكىلدى ماڭىزدى ءارى قۇپيا ساقتالادى» دەدى.
ءمينيستردىڭ ايتۋىنشا، بۇل دەرەكتەردى قولعا ءتۇسىرۋ ءۇشىن «كۇردەلى، اۋقىمدى، كەشەندى جانە ۇزاق مەرزىمدى» ارنايى وپەراتسيا جۇرگىزىلگەن.
IRIB اگەنتتىگى سەنبى كۇنى جاريالاعان حابارلامادا بۇل مالىمەتتەردىڭ قاۋىپسىز جەتكىزىلۋىن قامتاماسىز ەتۋ ماقساتىندا بەلگىلى ءبىر ۋاقىتقا دەيىن اقپارات تاراتىلماعانى ايتىلعان. سونداي-اق، الىنعان مالىمەتتەردىڭ كولەمى سونشالىقتى كوپ بولعاندىقتان، ولاردى ساراپتاۋعا بىرنەشە اپتا ۋاقىت كەتكەنى دە اتاپ وتىلگەن.
