قازاقستاندا العاش رەت ۇلت زيالىلارىنىڭ ولەڭدەرىنە جازىلعان اندەر توپتاماسى جارىق كوردى، دەپ حابارلايدى "ادىرنا" ۇلتتىق پورتالى.
31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي تانىمال كومپوزيتور جانە ورىنداۋشى ەركەش شاكەەۆتىڭ «الاش» اتتى مۋزىكالىق البومى جارىققا شىقتى.
البومعا ساكەن سەيفۋللين، ماعجان جۇماباەۆ، احمەت بايتۇرسىنۇلى، مىرجاقىپ دۋلاتۇلى، ءىلياس جانسۇگىروۆ، شاكارىم، بەيىمبەت مايلين، سۇلتانماحمۇت تورايعىروۆ سىندى قازاق ادەبيەتىنىڭ ۇلى تۇلعالارىنىڭ شىعارمالارىنا جازىلعان اندەر ەنگەن.
البوم تۇساۋكەسەرىندە رەجيسسەر ازيز جامباكيەۆ (Shivang) مىرجاقىپ دۋلاتۇلىنىڭ «جۇت» جانە «ەلىم-اي» اندەرىنە تۇسىرىلگەن بەينەبايانداردى ۇسىندى. بەينەروليكتەر ورتالىق مەملەكەتتىك كينو-فوتوقۇجاتتار جانە دىبىس جازبالار ارحيۆىنەن الىنعان بۇرىن-سوڭدى جاريالانباعان تاريحي كادرلارمەن تولىقتىرىلعان.
البوم ايگىلى لوندوندىق Metropolis Studios ستۋدياسىندا
جازىلىپ، الماتىدا يۋري دەمچەنكونىڭ ستۋدياسىندا دىبىسقا جازىلدى. ساپالى مۋزىكالىق وڭدەۋگە گرەممي سىيلىعىنىڭ يەگەرلەرى پول نورريس (سۆەدەنيە) پەن مەتت كولتون (ماستەرينگ) اتسالىسقان. جوباعا كوپتەگەن وتاندىق مۋزىكانتتار مەن ورىنداۋشىلار قاتىسقان. ولاردىڭ قاتارىندا ارحات قۋانىشاليەۆ، ىلەس جالعاسبەك، نۇراي ايتۋاروۆا، نۇربولات قىدىرباەۆ جانە «Steppe Sons» توبى بار.
البوم ساتىلىمىنان تۇسكەن بارلىق قاراجات قۋعىن-سۇرگىنگە ۇشىراعان قازاق اقىندارىنىڭ مۇراسىن ساقتاپ، دامىتۋعا جۇمسالادى. قولداۋ بىلدىرگىسى كەلەتىندەر ءۇشىن ارنايى سىلتەمە دە جاريالانعان.
ايتا كەتەيىك، كومپوزيتور، اقىن جانە ءانشى ەركەش شاكەەۆ بىرنەشە كۇن بۇرىن Almaty Theatre ساحناسىندا وتەدى دەپ جوسپارلانعان ساياسي قۋعىن-سۇرگىن مەن اشارشىلىق قۇرباندارىن ەسكە الۋعا ارنالعان “الاش” كونتسەرتىنىڭ بولمايتىنىن حابارلاعان ەدىك.
ۇقساس جاڭالىقتار
