قازاقستان پرەزيدەنتى قاسىم-جومارت توقاەۆ ءبىرىنشى «ورتالىق ازيا – يتاليا» سامميتىندە يتاليامەن ىقپالداستىقتىڭ پەرسپەكتيۆتى باعىتتارىنا قاتىستى ويىن ايتتى، دەپ حابارلايدى “ادىرنا”.
«ساۋدا-ەكونوميكالىق بايلانىستى تەرەڭدەتۋ – باستى باسىمدىق. الەمنىڭ نەگىزگى ەكونوميكالىق پوليۋستەرى اراسىنداعى تاريفتىك قاقتىعىستىڭ سالدارى بارلىق ەل ءۇشىن اۋىر بولۋى مۇمكىن. مۇنداي جاعدايدا بۇرىن جولعا قويىلعان ساۋدا-ەكونوميكالىق بايلانىستاردى ساقتاپ قالۋمەن بىرگە، ونى نىعايتۋعا كۇش سالۋ دا وتە ماڭىزدى. ءبىزدىڭ ويىمىزشا، بىرلەسكەن جوبالاردى ىسكە قوسۋعا، ەڭ الدىمەن، قوسىلعان قۇنى جوعارى ءونىم شىعارۋ ەسەبىنەن تاۋارلاردىڭ ءتۇرىن كوبەيتۋگە باسا ءمان بەرۋگە بولادى. ماسەلەن، قازاقستان يتالياعا جالپى قۇنى 1 ميلليارد دوللارعا جۋىقتايتىن تاۋاردىڭ 100-دەن اسا ءتۇرى بويىنشا ەكسپورت كولەمىن ارتتىرۋعا دايىن. بۇل رەتتە مەتاللۋرگيا، ماشينا جاساۋ، مۇناي-حيميا ونەركاسىبى جانە باسقا دا ونىمدەر تۋرالى ءسوز بولىپ وتىر”، – دەدى پرەزيدەنت.
قاسىم-جومارت توقاەۆ ورتالىق ازيا ەلدەرى ەۋروپاعا وزدەرىنىڭ اگروونەركاسىپ ونىمدەرىن جەتكىزۋدە مول الەۋەتكە يە
دەپ سانايدى. بۇدان بولەك، ساۋدا ۇيلەرى مەن لوگيستيكالىق ورتالىقتاردىڭ اشىلۋى ەلدەر اراسىنداعى ساۋدا-ساتتىققا تىڭ سەرپىن بەرەدى. وسى ورايدا، قازاقستان پرەزيدەنتى الماتىدا يتاليا ساۋدا ءۇيىن اشۋدى ۇسىندى.
سونداي-اق، پرەزيدەنت قازاقستان-يتاليا سەرىكتەستىگىنىڭ لوكوموتيۆى سانالاتىن ەنەرگەتيكا سالاسىنداعى ىنتىماقتاستىقتى تاعى ءبىر وزەكتى مىندەت رەتىندە اتادى.
«ەلىمىز ەۋروپا وداعىنا مۇناي ەكسپورتتاۋشى مەملەكەتتەردىڭ العاشقى ۇشتىگىنە كىرەدى. بىلتىر قازاقستاننان يتاليا نارىعىنا جەتكەن مۇناي كولەمى 30 ميلليون توننادان استى. بۇل 2023 جىلعى كورسەتكىشتەن 27 پايىزعا ارتىق. قاجەت بولعان جاعدايدا ونىڭ كولەمىن ارتتىرۋعا دايىنبىز. سونىمەن قاتار بولاشاعىمىز بالامالى ەنەرگيا كوزدەرىنە بايلانىستى بولماق. بۇل قازىردىڭ وزىندە انىق بايقالادى. تومەن كومىرتەكتى ەكونوميكاعا جۇيەلى تۇردە كوشۋ – قازاقستان باسىمدىقتارىنىڭ ءبىرى. يتاليالىق سەرىكتەستەرىمىزبەن بىرلەسىپ، ەلىمىزدىڭ بىرقاتار وڭىرىندە جەل مەن كۇن ەلەكتر ستانتسيالارىن سالىپ جاتىرمىز. اتالعان جوبالار ءۇشىن ريزاشىلىعىمىزدى بىلدىرەمىز»، – دەدى پرەزيدەنت.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز