Qazaqstan Prezidentı Qasym-Jomart Toqaev bırınşı «Ortalyq Aziia – İtaliia» sammitınde İtaliiamen yqpaldastyqtyŋ perspektivtı baǧyttaryna qatysty oiyn aitty, dep habarlaidy “Adyrna”.
«Sauda-ekonomikalyq bailanysty tereŋdetu – basty basymdyq. Älemnıŋ negızgı ekonomikalyq poliusterı arasyndaǧy tariftık qaqtyǧystyŋ saldary barlyq el üşın auyr boluy mümkın. Mūndai jaǧdaida būryn jolǧa qoiylǧan sauda-ekonomikalyq bailanystardy saqtap qalumen bırge, ony nyǧaituǧa küş salu da öte maŋyzdy. Bızdıŋ oiymyzşa, bırlesken jobalardy ıske qosuǧa, eŋ aldymen, qosylǧan qūny joǧary önım şyǧaru esebınen tauarlardyŋ türın köbeituge basa män beruge bolady. Mäselen, Qazaqstan İtaliiaǧa jalpy qūny 1 milliard dollarǧa juyqtaityn tauardyŋ 100-den asa türı boiynşa eksport kölemın arttyruǧa daiyn. Būl rette metallurgiia, maşina jasau, mūnai-himiia önerkäsıbı jäne basqa da önımder turaly söz bolyp otyr”, – dedı prezident.
Qasym-Jomart Toqaev Ortalyq Aziia elderı Europaǧa özderınıŋ agroönerkäsıp önımderın jetkızude mol äleuetke ie dep sanaidy. Būdan bölek, sauda üilerı men logistikalyq ortalyqtardyŋ aşyluy elder arasyndaǧy sauda-sattyqqa tyŋ serpın beredı. Osy oraida, Qazaqstan prezidentı Almatyda İtaliia sauda üiın aşudy ūsyndy.
Sondai-aq, prezident Qazaqstan-İtaliia serıktestıgınıŋ lokomotivı sanalatyn energetika salasyndaǧy yntymaqtastyqty taǧy bır özektı mındet retınde atady.
«Elımız Europa Odaǧyna mūnai eksporttauşy memleketterdıŋ alǧaşqy üştıgıne kıredı. Byltyr Qazaqstannan İtaliia naryǧyna jetken mūnai kölemı 30 million tonnadan asty. Būl 2023 jylǧy körsetkışten 27 paiyzǧa artyq. Qajet bolǧan jaǧdaida onyŋ kölemın arttyruǧa daiynbyz. Sonymen qatar bolaşaǧymyz balamaly energiia közderıne bailanysty bolmaq. Būl qazırdıŋ özınde anyq baiqalady. Tömen kömırtektı ekonomikaǧa jüielı türde köşu – Qazaqstan basymdyqtarynyŋ bırı. İtaliialyq serıktesterımızben bırlesıp, elımızdıŋ bırqatar öŋırınde jel men kün elektr stansiialaryn salyp jatyrmyz. Atalǧan jobalar üşın rizaşylyǧymyzdy bıldıremız», – dedı prezident.
Ūqsas jaŋalyqtar
