ەكولوگيا تالاپتارىن ورىنداماعان. مۇناي كومپانيالارىنا 61,1 ملرد تەڭگە ايىپپۇل سالىندى

ەكولوگيا جانە تابيعي رەسۋرستار مينيسترلىگى ەلدەگى ءىرى مۇناي كومپانيالارىنا ايىپپۇل سالدى. بۇل تۋرالى پرەمەر-مينيستر ولجاس بەكتەنوۆ دەپۋتاتتار ساۋالىنا بەرگەن جاۋابىندا جازىلعان، دەپ حابارلايدى “ادىرنا” ۇلتتىق پورتالى.  اقپاراتقا سايكەس، 2022–2024 جىلدارى ەكولوگيالىق زاڭبۇزۋشىلىقتارى ءۇشىن «تەڭىزشەۆرويل»، North Caspian Operating Company N.V. (NCOC), «كاسپي مۇناي» جانە «ماڭعىستاۋمۇنايگاز» كومپانيالارىنا 61,1 ملرد تەڭگە اكىمشىلىك ايىپپۇل سالىندى. ونىڭ ىشىندە «تەڭىزشەۆرويل» كومپانياسىنان 2,8 ملرد تەڭگەدەن استام، NCOC-تان 12,4 ملرد تەڭگە كولەمىندە ايىپپۇل ءوندىرىلدى. 2023 جىلى «كاسپي مۇناي» اق 13,7 ملرد تەڭگەگە، ال «ماڭعىستاۋمۇنايگاز» اق 32,2 ملرد تەڭگەگە جاۋاپكەرشىلىككە تارتىلعان. «كاسپي تەڭىزى شەلفىندە جۇمىس ىستەيتىن بارلىق كەن ورنىن پايدالانۋشىلار، سونىڭ ىشىندە ءونىمدى ءبولۋ تۋرالى كەلىسىمگە (وبك) قاتىسۋشىلار دا قازاقستاننىڭ ەكولوگيالىق زاڭناماسىنا باعىنۋى ءتيىس. مىسالى، 1997 جىلعى 18 قاراشادا جاسالعان سولتۇستىك كاسپي جوباسى جانە 1993 جىلعى 2 ساۋىردەگى تەڭىز جوباسى بويىنشا كەلىسىمدەردە ەكولوگيالىق جەڭىلدىكتەر قاراستىرىلماعان. بۇل جوبالار بويىنشا مەردىگەرلەر مەن وپەراتورلار قورشاعان ورتانى قورعاۋ سالاسىنداعى زاڭ تالاپتارىن ساقتاۋى ءتيىس»، – دەپ جازىلعان پرەمەر-مينيستر جاۋابىندا. ولجاس بەكتەنوۆتىڭ ايتۋىنشا، ۇكىمەت ەكولوگيالىق زاڭنامانى جەتىلدىرۋ بويىنشا جۇيەلى جۇمىس جۇرگىزىپ جاتىر. ماقسات – ەكونوميكالىق دامۋ مەن قورشاعان ورتانى قورعاۋ اراسىنداعى تەپە-تەڭدىكتى ساقتاۋ. ەگەر كاسىپورىندار بۇل تالاپتاردى ورىنداماسا، ايىپپۇلدار سالىنىپ، ەميسسيالارعا تولەم مولشەرلەمەلەرى 2, 4 نەمەسە 8 ەسەگە دەيىن ارتادى. لاستاۋشى زاتتار شەگىنەن اسىپ كەتكەن جاعدايدا جاۋاپكەرشىلىك كۇشەيتىلەدى.