ەۋروپالىق وداق اقش-تان اكەلىنەتىن تاۋارلارعا قاتىستى جوسپارلانعان جاۋاپتىق باج سالىعىن 90 كۇنگە شەگەردى. بۇل شەشىم ۆاشينگتوننىڭ ءوز باج سالىعىن ۋاقىتشا توقتاتۋىنا بايلانىستى قابىلداندى، دەپ حابارلايدى "ادىرنا" ۇلتتىق پورتالى DW-عا سىلتەپ.
بۇل تۋرالى 10 ءساۋىر كۇنى ەۋروكوميسسيا توراعاسى ۋرسۋلا فون دەر ليايەن مالىمدەدى.
ء"بىز پرەزيدەنت ترامپتىڭ مالىمدەمەسىن نازارعا الدىق. كەلىسسوزدەرگە مۇمكىندىك بەرگىمىز كەلەدى. قاتىسۋشى مەملەكەتتەردىڭ قولداۋىنا يە بولعان ەو-نىڭ قارسى شارالارىن قابىلداۋ پروتسەسى اياقتالۋعا جاقىن. الايدا ءبىز ولاردى 90 كۇنگە كەيىنگە قالدىرامىز", – دەدى فون دەر ليايەن. سونىمەن قاتار ول كەلىسسوزدەر ءساتسىز اياقتالعان جاعدايدا ەو قارسى شارالاردى ىسكە قوساتىنىن اتاپ ءوتتى.
بۇعان دەيىن، 7 ساۋىردە ەو-نىڭ ساۋدا ىستەرى جونىندەگى كوميسسارى ماروش شەفچوۆيچ بريۋسسەل 15 ساۋىردەن باستاپ اقش-تان كەلەتىن كەيبىر تاۋارلارعا العاشقى قارسى باج سالىعىن ەنگىزۋدى جوسپارلاپ وتىرعانىن حابارلاعان بولاتىن. بۇل تىزىمگە امەريكالىق دجينسى، ۆيسكي، جەرجاڭعاق مايى، موتوتسيكلدەر جانە باسقا دا تاۋارلار كىرگەن.
الداعى ۋاقىتتا بۇل ءتىزىم كەڭەيىپ، اقش-تىڭ اۋىل شارۋاشىلىعى ونىمدەرى: قۇس ەتى، سيىر ەتى، كەيبىر تەڭىز ونىمدەرى، جاڭعاقتار، جۇمىرتقا، ءسۇت ونىمدەرى، قانت پەن كوكونىستەر ەنگىزىلۋى مۇمكىن. سونداي-اق كەيبىر ونەركاسىپتىك تاۋارلار، بىلعارى بۇيىمدار، تۇرمىستىق تەحنيكا، قۇرال-سايماندار، پلاستماسسا جانە اعاش ونىمدەرى دە بۇل تىزىمگە ەنۋى ىقتيمال.
