Global Financial Integrity تالداۋ ورتالىعى زاڭسىز يەمدەنگەن قاراجاتتارىن جىلجىمايتىن مۇلىك ارقىلى اقش-تا زاڭداستىرعان بيزنەسمەندەردىڭ ءتىزىمىن جاريالادى. ولاردىڭ اراسىندا الماتىنىڭ بۇرىنعى اكىمى، ەكس-مينيستر ۆيكتور حراپۋنوۆ، بۇرىنعى مۇناي جانە گاز ءمينيسترى ساۋات مىڭباەۆ پەن قازكوممەرتسبانكتىڭ بۇرىنعى يەسى اسقار الشىنباەۆ بار، دەپ حابارلايدى «ادىرنا» ءتىلشىسى.
تالداۋدا ۆيكتور حراپۋنوۆتىڭ نيۋ-يورك پەن وگايو شتاتتارىندا قۇنى 35 ميلليون دوللار تۇراتىن جىلجىمايتىن مۇلكى بار ەكەنى كورسەتىلگەن.
ال ساۋات مىڭباەۆ پەن اسقار الشىنباەۆتىڭ جىلجىمايتىن مۇلكى 391 ميلليون دوللارعا باعالانىپ وتىر. كاسىپكەرلەرگە تيەسىلى كەڭسە عيماراتتارى مەن پاتەرلەر نيۋ-يورك پەن فلوريدادا ورنالاسقان.
ەسكە سالايىق، بۇعان دەيىن ەكس-پرەزيدەنت نۇرسۇلتان نازارباەۆتىڭ تۋىستارىنىڭ، ءماجىلىستىڭ بۇرىنعى سپيكەرى نۇرلان نىعماتۋليننىڭ جانە باسقا دا قازاقستاندىقتاردىڭ دۋبايدا قىمبات جىلجىمايتىن مۇلىكتەرى بار ەكەنى بەلگىلى بولعان ەدى.
