الماتى وبلىسى، ەڭبەكشىقازاق اۋدانى «تولقىن ورتا مەكتەبىنىڭ» تۇلەگى قۋاندىق سانجار 2024-2025 وقۋ جىلىنىڭ تۇلەكتەرى اراسىندا ەڭ جوعارى 140 بالل جيناپ، ۇزدىك ناتيجە كورسەتتى، دەپ حابارلايدى "ادىرنا" ۇلتتىق پورتالى.
بۇل تۋرالى الماتى وبلىسى اكىمىنىڭ ءباسپاسوز قىزمەتى حابارلادى.
وبلىس اكىمى مارات سۇلتانعازيەۆ سانجاردىڭ جەتىستىگىن جوعارى باعالاپ، ونىڭ تاباندىلىعى مەن بىلىمگە دەگەن ۇمتىلىسىن اتاپ ءوتتى.
"بۇل – ۇلكەن ەڭبەكتىڭ، تالماي ىزدەنىستىڭ جانە ساپالى ءبىلىمنىڭ جەمىسى. سانجاردىڭ جەتىستىگى – ۇستازدارى مەن اتا-اناسىنىڭ قولداۋىنىڭ، جۇيەلى دايىندىقتىڭ ايقىن كورىنىسى. وسى ورايدا، بىلىمگە دەگەن ۇمتىلىسى مەن تاباندىلىعى ءۇشىن قۋاندىق سانجار عالىمجانۇلىن شىن جۇرەكتەن قۇتتىقتايمىز! الداعى وقۋىندا دا ساتتىلىك سەرىك بولىپ، بولاشاقتا ەل دامۋىنا ءوز ۇلەسىن قوساتىنىنا سەنىمىمىز مول،" – دەدى اكىم.
«تولقىن ورتا مەكتەبىنىڭ» ۇستازدارى مەن تۇلەكتىڭ اتا-انالارى بۇل جەتىستىككە ەرەكشە قۋانىپ، سانجاردىڭ بولاشاقتا دا بيىك بەلەستەردى باعىندىراتىنىنا سەنىم ءبىلدىردى.
بيىلعى ناۋرىز ايىندا وتكەن ۇبت جوعارى باسەكەلەستىك جاعدايدا ءوتىپ، تالاپكەرلەرگە بىلىمدەرىن دالەلدەۋگە مۇمكىندىك بەردى. ۇلتتىق تەستىلەۋ ورتالىعىنىڭ مالىمەتىنشە، كەيبىر تالاپكەرلەردىڭ ناتيجەسى ەرەجەنى بۇزعانى ءۇشىن جويىلعان.
ەسكە سالا كەتەيىك، ناۋرىزداعى تەستىلەۋ كەزىندە 22 تالاپكەردىڭ ناتيجەسى جويىلعانى حابارلانعان بولاتىن.
