Almaty oblysy, Eńbekshiqazaq aýdany «Tolqyn orta mektebiniń» túlegi Qýandyq Sanjar 2024-2025 oqý jylynyń túlekteri arasynda eń joǵary 140 ball jınap, úzdik nátıje kórsetti, dep habarlaıdy "Adyrna" ulttyq portaly.
Bul týraly Almaty oblysy ákiminiń baspasóz qyzmeti habarlady.
Oblys ákimi Marat Sultanǵazıev Sanjardyń jetistigin joǵary baǵalap, onyń tabandylyǵy men bilimge degen umtylysyn atap ótti.
"Bul – úlken eńbektiń, talmaı izdenistiń jáne sapaly bilimniń jemisi. Sanjardyń jetistigi – ustazdary men ata-anasynyń qoldaýynyń, júıeli daıyndyqtyń aıqyn kórinisi. Osy oraıda, bilimge degen umtylysy men tabandylyǵy úshin Qýandyq Sanjar Ǵalymjanulyn shyn júrekten quttyqtaımyz! Aldaǵy oqýynda da sáttilik serik bolyp, bolashaqta el damýyna óz úlesin qosatynyna senimimiz mol," – dedi ákim.
«Tolqyn orta mektebiniń» ustazdary men túlektiń ata-analary bul jetistikke erekshe qýanyp, Sanjardyń bolashaqta da bıik belesterdi baǵyndyratynyna senim bildirdi.
Bıylǵy naýryz aıynda ótken UBT joǵary básekelestik jaǵdaıda ótip, talapkerlerge bilimderin dáleldeýge múmkindik berdi. Ulttyq testileý ortalyǵynyń málimetinshe, keıbir talapkerlerdiń nátıjesi erejeni buzǵany úshin joıylǵan.
Eske sala keteıik, naýryzdaǵy testileý kezinde 22 talapkerdiń nátıjesi joıylǵany habarlanǵan bolatyn.
