نازارباەۆ ۋنيۆەرسيتەتىندە ستۋدەنت جىگىت دارەتحانادا وتىرعان قىزداردى كامەراعا ءتۇسىرىپ العانى تۋرالى اقپارات تاراپ كەتتى، دەپ حابارلايدى "ادىرنا" ۇلتتىق پورتالى.
بۇل تۋرالى ميحايل كوزاچكوۆ ءوزىنىڭ تەلەگرام ارناسىندا جازعان.
ونىڭ دەرەگىنە سايكەس، نازارباەۆ ۋنيۆەرسيتەتىندە ستۋدەنت جىگىت 30-عا تارتا قىزدىڭ دارەتحانادا وتىرعانىن كامەراعا تۇسىرگەن.
«نازارباەۆ ۋنيۆەرسيتەتىندە ستۋدەنت جىگىت دارەتحانادا قىزداردى ءتۇسىرىپ العان. ودان ءتۇرلى زارداپ شەگۋشىلەر تۇسىرىلگەن 30 ۆيدەو بار. ول جىگىتكە نە بولاتىنى ازىرگە بەلگىسىز. ۋنيۆەرسيتەت رەسمي مالىمدەمە جاساعان جوق. ءبىز زارداپ شەگۋشىلەر ءۇشىن ادىلەتتىلىك بولعانىن تالاپ ەتەمىز. رەپۋتاتسيا ءۇشىن ءۇنسىز قالعاندى توقتاتىڭىزدار»، - دەپ جازدى decolonized.icon اتاۋىن قولدانعان ازامات Threads قوسىمشاسىندا.
ال اتالعان ايىپتاۋلارعا قاتىستى ۋنيۆەرسيتەت اكىمشىلىگى جاۋاپ بەرگەن.
«قازىر وسى جاعدايعا قاتىستى ىشكى تەرگەۋ جۇمىسى ءجۇرىپ جاتىر. ۋنيۆەرسيتەتتە قابىلدانعان رەسمي تارتىپكە بايلانىستى ناقتى دالەلدەرى بار بازا جيناقتالىپ جاتىر. ءبىز دالەلدى سەبەپسىز ەشكىمدى ايىپتاي المايمىز. ءوزىڭىز انىقتاپ تاپقان زاڭبۇزۋشىلىق بويىنشا قانداي دا ءبىر دالەلدى اقپاراتىڭىز بولسا نەمەسە كۋاگەر بولساڭىز ۋنيۆەرسيتەتتىڭ ستۋدەنتتەرمەن جۇمىس ىستەۋ دەپارتامەنتىنە جۇگىنۋىڭىز كەرەك ەدى»، - دەپ جازدى وقۋ ورنى.
