ءماجىلىس SMM مامانىن ىزدەۋگە قاتىستى حابارلاندىرۋ جاريالاپ، وندا ورىس ءتىلىن جەتىك مەڭگەرگەن ۇمىتكەرلەرگە باسىمدىق بەرىلەتىنىن كورسەتكەن. بۇل تالاپ الەۋمەتتىك جەلىلەردە قىزۋ تالقىعا ءتۇسىپ، قوعام اراسىندا ۇلكەن رەزونانس تۋدىردى، دەپ حابارلايدى "ادىرنا" ۇلتتىق پورتالى.
جۇرتشىلىق مەملەكەتتىك مەكەمەنىڭ مەملەكەتتىك تىلگە باسىمدىق بەرمەۋىن سىنعا الدى، ويتكەنى قازاقستان رەسپۋبليكاسىنىڭ كونستيتۋتسياسى بويىنشا قازاق ءتىلى – مەملەكەتتىك ءتىل.
جاريالانعان حابارلاندىرۋدا بولاشاق قىزمەتكەردىڭ ءماجىلىستىڭ الەۋمەتتىك جەلىلەرىن جۇرگىزۋى ءتيىس ەكەنى ايتىلعان. الايدا تالاپتار قاتارىندا ورىس تىلىندە ساۋاتتى جازۋ مىندەتتەلگەنىمەن، قازاق ءتىلىن ءبىلۋ تەك قوسىمشا ارتىقشىلىق رەتىندە كورسەتىلگەن.
"كىمدى كۇتەمىز؟ وسى سالادا كەمىندە 1 جىلدىق تاجىريبەسى بار; گرافيكالىق قوسىمشالارمەن جانە SMM-ءنىڭ زاماناۋي قۇرالدارىمەن، سونىڭ ىشىندە نەيروجەلىلەرمەن جۇمىس ىستەي الاتىن; ورىس تىلىندە ساۋاتتى جازا بىلەتىن; قازاق ءتىلىن ءبىلۋى قوسىمشا ارتىقشىلىق بولىپ سانالاتىن; اناليتيكالىق قۇرالدارمەن جۇمىس ىستەپ، Facebook پەن Telegram-دا جىلجىتۋ ستراتەگياسىن جاساي الاتىن مامان قاجەت" – دەپ جازىلعان ەدى.
كەيىننەن بۇل حابارلاندىرۋ جۇمىس ىزدەۋ پلاتفورماسىنان وشىرىلگەن. قوعام بەلسەندىلەرى مەن جەلى قولدانۋشىلارى مەملەكەتتىك ءتىلدىڭ مارتەبەسى ەسكەرۋسىز قالماۋى ءتيىس ەكەنىن العا تارتىپ، بيلىك وكىلدەرىنەن بۇل ماسەلەگە ناقتى جاۋاپ بەرۋدى تالاپ ەتۋدە.
