لوندون AZAL اۋە كومپانياسىنىڭ اقتاۋ ماڭىندا بولعان ۇشاق اپاتىنىڭ سەبەپتەرىن زەرتتەۋگە قولداۋ كورسەتۋگە دايىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى Report اگەنتتىگىنە سىلتەمە جاساپ.
بۇل تۋرالى ۇلىبريتانيانىڭ سىرتقى ىستەر ءمينيسترى دەۆيد لەممي ازەربايجاننىڭ سىرتقى ىستەر ءمينيسترى دجەيحۋن بايراموۆپەن تەلەفون ارقىلى سويلەسۋ كەزىندە ايتقان.
ۇلىبريتانيا ءسىم باسشىسى اۋە اپاتى سالدارىنان ورىن العان قايعىلى جاعدايعا بايلانىستى تاعى دا كوڭىل ايتىپ، ۇلىبريتانيانىڭ بۇل قايعىلى وقيعانىڭ سەبەپتەرىن انىقتاۋعا جانە تەرگەۋ بارىسىنا قولداۋ كورسەتۋگە دايىن ەكەنىن جەتكىزگەن.
ەسكە سالا كەتەيىك، AZAL اۋە كومپانياسىنىڭ باكۋ-گروزنىي باعىتى بويىنشا ۇشىپ بارا جاتقان جولاۋشىلار ۇشاعى 2024 جىلدىڭ 25 جەلتوقسانىندا قازاقستاننىڭ اقتاۋ قالاسى ماڭىندا اپاتقا ۇشىراعان بولاتىن. ۇشاق بورتىنداعى 67 ادامنىڭ 38-ءى قايتىس بولىپ، 29-ى امان قالدى.
الدىن الا مالىمەتتەر بويىنشا، ۇشاق اپاتى رەسەيدىڭ اۋە كەڭىستىگىندە فيزيكالىق جانە تەحنيكالىق سىرتقى ارالاسۋ سالدارىنان بولعان.
