يراندا ۇلتتىق ۆاليۋتانىڭ دوللارمەن سالىستىرعانداعى باعامى رەكوردتىق تومەن دەڭگەيگە قۇلدىراعاننان كەيىن سوڭعى ءۇش جىلداعى ەڭ ءىرى نارازىلىقتار باستالدى، دەپ حابارلايدى «ادىرنا» ءتىلشىسى CNN-گە سىلتەمە جاساپ.
يراننىڭ مەملەكەتتىك تەلەارناسى ورتالىق بانك توراعاسى موحاممەد رەزا ءفارزيننىڭ قىزمەتىنەن كەتكەنىن مالىمدەدى.
ساۋداگەرلەر مەن دۇكەن يەلەرىنىڭ نارازىلىق اكتسيالارى تەگەراننىڭ ورتالىعىندا، ەل استاناسىنداعى ۇلكەن بازار ماڭىندا، سونداي-اق يسفاحان، شيراز جانە مەشحەد سياقتى ءىرى قالالاردا ءوتتى. تەگەراننىڭ كەيبىر اۋداندارىندا پوليتسيا نارازىلىق بىلدىرۋشىلەردى تاراتۋ ءۇشىن كوزدەن جاس اعىزاتىن گاز قولدانعان.
جەكسەنبى كۇنى يران ريالىنىڭ باعامى ءبىر دوللار ءۇشىن 1,42 ميلليونعا دەيىن قۇلدىرادى. دۇيسەنبى كۇنى ول 1,38 ميلليون ريال دەڭگەيىندە ساۋدالاندى.
سوڭعى ءبىر اپتادا ءفارزيننىڭ ىقتيمال وتستاۆكاسى تۋرالى قاۋەسەتتەر تاراعان بولاتىن. ول 2022 جىلى قىزمەتكە كىرىسكەن كەزدە ريال باعامى ءبىر دوللار ءۇشىن شامامەن 430 مىڭ بولعان.
ۆاليۋتانىڭ كۇرت قۇنسىزدانۋى ينفلياتسيالىق قىسىمدى كۇشەيتىپ، ازىق-تۇلىك پەن كۇندەلىكتى تۇتىنۋ تاۋارلارىنىڭ قىمباتتاۋىنا الىپ كەلدى جانە حالىقتىڭ قارجىلىق جاعدايىن ودان ءارى قيىنداتتى. مەملەكەتتىك ستاتيستيكا ورتالىعىنىڭ دەرەگىنشە، جەلتوقسان ايىندا ينفلياتسيا دەڭگەيى وتكەن جىلدىڭ وسى كەزەڭىمەن سالىستىرعاندا 42,2 پايىزعا جەتىپ، قاراشا ايىمەن سالىستىرعاندا 1,8 پايىزعا وسكەن. ازىق-تۇلىك باعاسى ءبىر جىلدا 72 پايىزعا، مەديتسينالىق تاۋارلار 50 پايىزعا قىمباتتاعان.
