اەس-ءتى رەسەي سالعان جاعدايداعى ساياسي قاۋىپ قانداي؟ بۇل سۇراققا ۇكىمەت وتىرىسىنان كەيىنگى بريفينگتە پرەمەر-ءمينيستردىڭ ءبىرىنشى ورىنباسارى رومان سكليار جاۋاپ بەردى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، اەس سالاتىن ەلدەرمەن اراداعى شارتتا سانكتسيالىق كەلىسىم قاراستىرىلاتىن بولادى.
«كونسورتسيۋم بولاتىن شىعار. ەڭ باستىسى — قاۋىپسىزدىك. سونىمەن قاتار ءبىز سالىناتىن جاڭا ستانسا ەڭ تىڭ جوبالىق شەشىمدەر مەن ءوز سالاسىنىڭ كوشباسشىسى سانالاتىن ءوندىرۋشى ەلدىڭ وزىق تەحنولوگياسى بولعانىنا مۇددەلىمىز. سوندىقتان شەشىم كونفيگۋراتسيا بويىنشا قابىلدانادى. ونىمەن مەن دە، الماسادام مايدانۇلى دا (ەنەرگەتيكا ءمينيسترى الماسادام ساتقاليەۆ) اينالىسپايدى. ارنايى جوبالىق توپ بولادى. ال ورىن الۋى مۇمكىن ساياسي تاۋەكەلدەر تۋىنداعان ساتىندە، ياعني جوبالاۋ بارىسىندا قاراستىرىلادى. ەگەر مۇنداي جايت ورىن السا، وندا ءتۇرلى كومپانيالارمەن، ءتۇرلى ەلدەرمەن اراداعى سانكتسيالار ەسكەرىلەتىنى ءسوزسىز، - دەدى ۇكىمەت باسشىسىنىڭ ءبىرىنشى ورىنباسارى باق وكىلدەرىنىڭ ساۋالىنا وراي.
ەسكە سالساق، 6 قازاندا رەفەرەندۋمعا كەلگەن پرەزيدەنت قاسىم-جومارت توقاەۆ «اەس قۇرىلىسىن قاي ەل جۇرگىزەدى؟» دەگەن سۇراققا جاۋاپ بەرگەن بولاتىن.
«بۇل وڭاي ماسەلە ەمەس. ۇكىمەت تالداۋ جاساپ، ءتيىستى كەلىسسوزدەر جۇرگىزۋگە ءتيىس. مەنىڭ پىكىرىمشە، قازاقستاندا ەڭ وزىق تەحنولوگيالارى بار الەمدىك كومپانيالاردان قۇرالعان حالىقارالىق كونسورتسيۋم جۇمىس ىستەۋى قاجەت. قالعانىن ۋاقىت كورسەتەدى»، دەدى مەملەكەت باسشىسى.
