پاۆلوداردا ەرلى-زايىپتى ينتەرنەت الاياقتارعا كومەكتەسكەن. بۇل تۋرالى ءىىم كيبەرقىلمىسقا قارسى ءىس-قيمىل دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، جالدامالى پاتەردە 5 SIM box قۇرىلعىسى تابىلدى. ونىڭ ارقايسىسىندا 8 SIM كارتادان ورناتىلعان. قۇرىلعى كومەگىمەن ينتەرنەت الاياقتىق جاساۋ ءۇشىن قولدانىلاتىن ۆيرتۋالدى ابونەنت نومىرلەرى تىركەلگەن.
بۇدان باسقا 4 روۋتەر مەن قازاقستاندىق جانە شەتەلدىك بايلانىس وپەراتورلارىنىڭ 53 SIM كارتاسى تاركىلەندى.
ەرلى-زايىپتى اپتا سايىن قۇرىلعىلارداعى SIM كارتالاردى اۋىستىرىپ وتىرعان.
«ۇستالعاندار پوليتسياعا جەتكىزىلدى. قازىرگى ۋاقىتتا تەرگەۋ جۇرگىزىلىپ جاتىر»، - دەدى ءىىم كيبەرقىلمىسقا قارسى ءىس-قيمىل دەپارتامەنتىنىڭ باستىعى جاندوس ءسۇيىنباي.
