اۋەجايدا رەيسىنەن كەشىككەن قىز FlyArystan اۋەكومپانياسى قىزمەتكەرىنە قول كوتەرگەنى انىقتالدى، دەپ حابارلايدى "ادىرنا" ۇلتتىق پورتالى.
وقيعا 14 قاڭتاردا بولعان.
كومپانيانىڭ ءباسپاسوز قىزمەتى وقيعاعا قاتىستى تۇسىنىكتەمە بەردى.
2025 جىلدىڭ 14 قاڭتارىندا الماتى – استانا باعىتى بويىنشا FS 7057 رەيسىنىڭ جولاۋشىسى الماتى حالىقارالىق اۋەجايىندا FlyArystan قىزمەتكەرىنە شابۋىل جاساعان. ەندى جولاۋشى كومپانيانىڭ «قارا تىزىمىنە» ەنەتىنى ايتىلدى.
«جولاۋشى رەيس ۋاقىتىنان 30 مينۋت بۇرىن تىركەۋ باعانىنا كەلىپ، رەيسكە تىركەلگەنىن راستاعاننان كەيىن، تەكسەرۋ ايماعىنا باعىتتالدى. الايدا جەتكىلىكسىز ۋاقىت قالۋىنا بايلانىستى جولاۋشى رەيسكە وتىرعىزۋعا ۇلگەرمەي قالعان. وسى رەتتە، رەيسكە وتىرعىزۋ ۇشۋ ۋاقىتىنا 30 مينۋت قالعاندا باستالاتىنىن جانە وسى ۋاقىتتا بارلىق جولاۋشىلاردىڭ گەيتتە بولۋى قاجەت ەكەنىن ەسكە سالامىز.
وسىدان كەيىن جولاۋشى تىركەۋ ايماعىنا قايتا ورالىپ، تەكسەرۋ ايماعىنا باعىت كورسەتكەن قىزمەتكەرگە قاتىستى اگرەسسيۆتى مىنەز-قۇلىق كورسەتە باستادى. وقيعا بارىسىندا ول قىزمەتكەردىڭ جەكە ءموبيلدى تەلەفونىن لاقتىرىپ، بەتى مەن ىشىنە سوققى جاسادى جانە سوزبەن قورقىتۋدى جالعاستىردى. بۇل اگرەسسيالىق ارەكەت بەينەكامەرالاردا جانە كۋاگەرلەردىڭ مالىمدەمەسىمەن راستالعان»، - دەلىنگەن حابارلامادا.
