ءماجىلىس دەپۋتاتى سەرىك ەرۋباەۆ سۋىق مەزگىلدە كولىكتى 5 مينۋتتان ارتىق قىزدىرعانى ءۇشىن سالىناتىن ايىپپۇلدارعا قاتىستى نورمانى قايتا قاراۋ قاجەتتىگىن ايتتى. بۇل تۋرالى ول ىشكى ىستەر ءمينيسترى ەرجان سادەنوۆكە جولداعان دەپۋتاتتىق ساۋالىندا مالىمدەدى.
دەپۋتاتتىڭ ايتۋىنشا، قولدانىستاعى ايىپپۇل نورمالارى كولىك جۇرگىزۋشىلەرى مەن كاسىپكەرلەرگە قيىندىق تۋدىرىپ وتىر.
"بۇل ايىپپۇل شاعىن دۇكەندەرگە تاۋارلاردى ءتۇسىرۋ نەمەسە تيەۋ كەزىندە ۇلكەن ماسەلە تۋعىزادى، اسىرەسە، اۋا تەمپەراتۋراسى مينۋس 20 گرادۋستان تومەن بولعان جاعدايدا. مۇنداي كەزدە قوزعالتقىشتى ءوشىرۋ ءتيىمسىز", – دەدى ول.
سەرىك ەرۋباەۆ ورتالىق جانە سولتۇستىك وڭىرلەردىڭ كليماتتىق ەرەكشەلىكتەرىن ەسكەرە وتىرىپ، 5 مينۋتتىق شەكتەۋدى قايتا قاراۋدى جانە زياندى قالدىقتاردى ازايتۋدىڭ بالاما، ادىلەتتى جولدارىن قاراستىرۋدى ۇسىندى.
سونىمەن قاتار، دەپۋتات ەكاتەرينا سمىشلياەۆا بۇل نورمانىڭ 60 جىلدان استام ۋاقىت بويى قولدانىستا ەكەنىن ەسكە سالىپ، قازىرگى نرمادا قۇقىقتىق انىقسىزدىق بار ەكەنىن اتاپ ءوتتى. ونىڭ ايتۋىنشا، ايىپپۇل سالۋ ءۇشىن ناقتى ەرەجەلەر مەن تالاپتاردى بەلگىلەۋ قاجەت.
دەپۋتاتتار جاۋاپكەرشىلىككە تارتۋ ءتارتىبىن ناقتىلاۋ، قولايسىزدىق تۇسىنىگىن ايقىنداۋ جانە شاعىمنىڭ نەگىزدىلىك تالاپتارىن بەكىتۋ قاجەتتىگىن العا تارتتى.
ەسكە سالا كەتەيىك، بۇعان دەيىن كولىكتى بەس مينۋتتان ارتىق قىزدىرعاندارعا 19 مىڭ تەڭگە ايىپپۇل سالىناتىنى تۋرالى جازعان ەدىك.
