موڭعوليا استاناسى ۇلان-باتىر قالاسىندا 11 قاڭتار كۇنى ۇكىمەتكە قارسى ميتينگ ءوتتى، دەپ حابارلايدى "ادىرنا" ۇلتتىق پورتالى News.mn سايتىنا سىلتەمە جاساپ.
شەرۋگە قاتىسۋشىلار موڭعوليا ۇكىمەتىن تۇتىنمەن، جۇمىسسىزدىقپەن جانە باسقا دا ماسەلەلەرمەن كۇرەسۋگە قابىلەتسىز دەپ ايىپتاپ، وتستاۆكاعا كەتۋدى تالاپ ەتۋدە.
نارازىلىق بىلدىرۋشىلەر توبى مەملەكەتتىك سارايدىڭ الدىندا، شىڭعىسحان ءمۇسىنى ماڭىندا شەرۋ وتكىزىپ جاتىر. كەيدە ولار سارايدى باسىپ الۋعا تىرىسسا، قاۋىپسىزدىك كۇشتەرى بۇل شابۋىلداردى بىرنەشە رەت تويتارىپ، قورعاۋدى جالعاستىرۋدا - دەپ جازدى News.mn مونعول جاڭالىقتار سايتى.
ۇلان-باتىردا نارازىلىق سالدارىنان قالانىڭ ورتالىق داڭعىلى جابىلىپ، 15 اۆتوبۋس توقتاتىلعان. قوعامدىق كولىك قىزمەتىنىڭ بۇزىلۋىنا بايلانىستى جەرگىلىكتى تۇرعىندار قالالىق كولىك باسقارماسىنا شاعىمدانۋدا.
نارازىلىق اكتسياسىنىڭ باستاماشىسى ءارى ۇيىمداستىرۋشىسى – «ەركىندىك اليانسى» پارتياسى. پارتيا وكىلدەرىنىڭ پىكىرىنشە، ۇكىمەت ءتۇتىن، كەپتەلىس، كەدەيلىك، جەمقورلىق، سالىقتار جانە جۇمىسسىزدىق سياقتى ماسەلەلەردى شەشە المايدى. سوندىقتان ۇكىمەتتى وتستاۆكاعا كەتۋى كەرەك دەپ سانايدى. وسىعان بايلانىستى «ەركىندىك اليانسى» پارتياسى پارلامەنتتىڭ 33 مۇشەسىنە ءتيىستى حات جىبەرگەن.
شەرۋگە قاتىسۋشىلار قازىرگى ۇكىمەتپەن ەشقانداي كەڭەس، كەزدەسۋ نەمەسە كەلىسسوزدەر وتكىزبەيتىنىن جانە ەشقانداي تۇسىنىكتەمەلەردى قابىلدامايتىنىن مالىمدەدى.
ەلدە پوليتسيا قىزمەتكەرلەرى كۇشەيتىلگەن رەجيمدە جۇمىس جاساۋدا. ولار نارازىلىق بىلدىرۋشىلەردى زاڭدار مەن دەمونستراتسيالاردى وتكىزۋ ەرەجەلەرىن ساقتاۋعا شاقىردى.
سايت مالىمەتىنشە، نارازىلىق بىلدىرۋشىلەر اراسىندا الكوگولدى ىشىمدىك ىشكەن ادامدار دا بار.
